Túrkistan oblysynda bilim sapasy máz emes — Prezıdent
ASTANA. KAZINFORM — Qazaqstan óńirlerindegi bilim sapasynyń aıyrmashylyǵyn azaıtyp, ásirese oqý úlgerimi tómen aımaqtarda aýyl mektepteriniń jaǵdaıyn jaqsartý qajet. Prezıdent Qasym-Jomart Toqaev UBT men PISA nátıjelerine toqtalyp, bilim sapasy tómen óńirlerdegi jumysty kúsheıtýdi tapsyrdy.
Osy tusta Memleket basshysy Ulttyq biryńǵaı testileýdiń bıylǵy nátıjelerine toqtaldy. Máselen, Qyzylorda, Soltústik Qazaqstan, Pavlodar, Qostanaı oblystarynyń, sondaı-aq, Astana jáne Almaty qalalarynyń túlekteri joǵary kórsetkishke qol jetkizdi.
Al Túrkistan, Ulytaý, Atyraý, Aqtóbe jáne Almaty oblystaryndaǵy jaǵdaı jaqsy dep aıtý qıyn.
— Ásirese, tıisti mınıstrlik pen ákimdik Túrkistan oblysyndaǵy ahýalǵa nazar aýdarýy kerek. PISA uıymynyń zertteýi de Túrkistan oblysyndaǵy bilim sapasynyń máz emes ekenin kórsetti. Bul — aımaqtyń oqý-aǵartý júıesinde olqylyqtar áli bar degen sóz, — dedi Qasym-Jomart Toqaev.
Bul rette Prezıdent oblystaǵy jaǵdaıdy daǵdarys dep te aıtýǵa bolmaıtynyn, oqýshylardyń basym bóligi aýylda turǵandyqtan, qolaıly jaǵdaı jetispeıtinin aıtty.
— Oblysta bilim alyp jatqan oqýshylardyń 75 paıyzǵa jýyǵy aýylda turady. Olardyń jan-jaqty jáne qarqyndy damýy úshin qolaıly jaǵdaı jasalýǵa tıis. Qajetti ınfraqurylym salyp, shalǵaı eldi mekenderge myqty mamandardy tartqan jón. Bul — Úkimettiń jáne ákimdikterdiń aldynda turǵan jedel mindet, jumysty josparly túrde tezdetip atqaryp, naqty nátıjelerge qol jetkizý qajet, — dep tapsyrma berdi Memleket basshysy.
Prezıdent tómen nátıje kórsetken barlyq aımaqtyń ákimderi bul baǵyttaǵy jumysty kúsheıtýi kerektigin aıtyp, Úkimetke osy jumysty tıimdi úılestirýdi tapsyrdy.
Buǵan deıin Qasym-Jomart Toqaev Prezıdent «Órleý» ortalyǵyn synǵa alyp, pedagogterdi attestatsııalaý talaptaryn jeńildetýdi tapsyrǵan edi.
Elimizge taǵy bes myńnan astam muǵalim jetispeıdi.
Sondaı-aq Prezıdent elimizdegi mektep qurylysyn jandandyrýdy tapsyrdy.
