Túrkistan oblysynda bilim salasynyń qyzmetkerleri 547 mıllıon teńgeden astam qarjy jymqyrdy degen aıyppen sottaldy

TÚRKІSTAN. KAZINFORM - Saryaǵash aýdandyq bilim bóliminiń qyzmetkerlerine qatysty qylmystyq is aıaqtaldy.

жемқорлық
Фото: видеодан алынған кадр

Aıyptalýshylar 2016-2023 jyldar aralyǵynda basshylyq jáne býhgalterlik qyzmetterdi atqara otyryp, bilim bóliminde nemese oǵan qarasty mekemelerde buryn-sońdy jumys istemegen adamdardyń atyna jalǵan tólem qujattaryn rásimdegen. Sodan atalǵan qujattardyń negizinde bıýdjet qarajaty úshinshi tulǵanyń shottaryna aýdarylyp, qasaqana jymqyrylǵan.

Qylmystyq árekettiń nátıjesinde memleketke jalpy 547 274 010 teńge materıaldyq zalal keltirgen.

Sottalýshylardyń kinási sot-ekonomıkalyq saraptama qorytyndylarymen, kýálerdiń jaýaptarymen, sottalýshylardyń sotta bergen jaýaptarymen jáne istiń basqa da qujattarymen tolyq dáleldendi.

Sot úkimimen kináliler 2 jyldan 7 jylǵa deıin bas bostandyǵynan aıryldy.

Atap aıtar bolsaq, bilim bólimin basqarǵan B.Maırıhov pen D. Aqatovqa 7 jylǵa bas bostandyǵynan aıyrý jazasy taǵaıyndaldy. Sondaı-aq belgili bir laýazymdardy atqarý quqyǵynan ómir boıyna aıyryldy.

Basshynyń mindetin atqarǵan Nurman Úsipbekovtiń belgili bir laýazymdardy atqarý quqyǵyna ómir boıyna tyıym salyndy jáne 2 jylǵa bas bostandyǵynan aıyrý jazasy taǵaıyndaldy.

Bas esepshi Jasulan Turymbetov pen bas esepshiniń orynbasary Erjan Asylov 7 jylǵa bas bostandyǵynan aıyryldy.

Keltirilgen shyǵyndy ótegen esepshi Erjan Berdibekov pen Gúlsara Ótegenova 2 jylǵa sottaldy jáne 2 jyl merzimge belgili bir laýazymdardy atqarý quqyǵynan aıyryldy.

Esepshiler Jánibek Tólegen men Manas Seıdázimovke shartty túrde jaza taǵaıyndaldy. Sondaı-aq esepshiler Akarıs Qudaıbergen men Nursultan Jolchıev keltirilgen shyǵyndy ótep berdi. Olarǵa da shartty jaza taǵaıyndaldy.

- Sot sottalýshylarǵa jaza taǵaıyndaý kezinde, olardyń jaýapkershiligin jeńildetenin mán-jaılarǵa, otbasy jaǵdaıyna, qylmyspen kelgen zalaldy tolyq qaıtarǵandaryn, buryn sotty bolmaǵandaryn eskerdi. Jábirlenýshi ókiliniń azamattyq talap qoıýdy qanaǵattandyrý quqyǵy tanylyp, onyń mólsheri týraly máseleni azamattyq sot isin júrgizý tártibimen sottyń qaraýyna bere alatyny túsindirildi. Úkim zańdy kúshine engen joq, - delingen Túrkistan oblystyq sotynyń baspasóz qyzmeti usynǵan aqparatta.

Aıta keteıik, budan buryn Atyraý sotynda memlekettik Týdy qorlaǵan taǵy bir jasóspirimniń isi qaralǵanyn jazǵan bolatynbyz.

Сейчас читают