Túrkistan oblysynda bilim salasynyń qyzmetkerleri 2,6 mlrd teńge jymqyrdy

Túrkistan oblysynda bilim berý salasynyń qyzmetkerleri 2 mlrd teńgeden astam soma jymqyrdy dep kúdiktelýde, dep habarlaıdy Kazinform Sybaılas jemqorlyqqa qarsy is-qımyl agenttigine silteme jasap.

«Túrkistan oblysy boıynsha Sybaılas jemqorlyqqa qarsy qyzmet Shardara jáne Saryaǵash aýdandarynyń bilim bólimderiniń býhgalterlerine qatysty sotqa deıingi tergeý júrgizip jatyr. Olar bıýdjet qarajatyn asa iri kólemde júıeli negizde jymqyryp keldi dep kúdiktelýde.

Tergeý málimetteri boıynsha, kúdikti tulǵalar 2020-2023 jyldar aralyǵynda bilim berý salasynda jumys istemeıtin tulǵalardyń shottaryna aqsha qarajatyn aýdarý, sondaı-aq mektep qyzmetkerlerine joǵary jalaqy esepteý arqyly shamamen 2,6 mlrd teńge soma jymqyrǵan.

Qazirgi ýaqytta Túrkistan oblysynyń bilim berý salasynda 17 adam qylmystyq jaýapkershilikke tartylyp jatyr, olardyń 4-i qamaýǵa alyndy.

Zalaldy óteý maqsatynda 39 jyljymaıtyn múlik, 44 avtomashına, zergerlik buıymdar jáne qylmystyq ister boıynsha aıyptalýshylardyń aqshalaı qarajattary buǵattaldy», - delingen málimette.

Antıkor aqparatyna súıensek, sonymen qatar tergeý barysynda Túrkistan oblysynyń Tekserý komıssııasynyń memlekettik aýdıtory áshkerelendi. Ol Saryaǵash aýdanyndaǵy mektepterdiń birinde aýdıt barysynda anyqtalǵan jymqyrý faktilerin paıdakúnemdik nıetpen jasyrǵan.

Sondaı-aq Jetisý oblysynda uıymdasqan qylmystyq toptyń quramynda 2,5 jyl ishinde 4,4 mlrd teńge jymqyrǵan qalalyq bilim bóliminiń qyzmetkerlerine qatysty sotqa deıingi tergeý aıaqtaldy. Qylmystyq topqa basshy men onyń qaramaǵyndaǵylar, sondaı-aq orta mektep býhgalteri kirdi. Barlyǵy – 13 adam.

Qylmystyq-protsestik kodeksiniń 201-babyna sáıkes ózge aqparat jarııa etilmedi.

Jemqorlyqqa qarsy agenttik bilim berý salasyndaǵy qylmystyq shemalar buǵan deıin Almaty, Shymkent qalalary men Qyzylorda, Aqtóbe, Almaty jáne Jetisý oblystarynda ashylǵanyn eske salyp ótti.