Túrkistan oblysynda bilim bóliminiń esepshileri 530 mıllıon teńgeni jymqyrdy degen kúdikke ilindi
TÚRKІSTAN. KAZINFORM – Túrkistan oblysynda bilim bóliminiń esepshileri 530 mıllıon teńgeni jymqyrdy degen kúdikke ilindi. Bul týraly Túrkistan oblysynyń prokýratýrasy málimdedi.
Oblys prokýratýrasy «Jetisaı aýdanynyń bilim bólimi» MM býhgalterlerine qatysty sotqa deıingi tergep-tekserýdi bastady.
Tergeý barysynda atalǵan mekemeniń býhgalterleri 2021-2023 jyldar aralyǵynda aldyn-ala sóz baılasqan adamdar toby bolyp, mektep qyzmetkerleriniń anketalyq málimetterin ózgertý arqyly jalaqyǵa bólingen memleket aqshalaryn asa iri mólsherde jymqyrǵandary anyqtaldy. Qazirgi tańnyń ózinde keltirilgen zalaldyń sommasy 530 mln.teńgeni quraǵan.
«Sotqa deıingi tergep-tekserý basqarmasymen 3 kúdikti ýaqytsha ustaý ızolıatoryna qamalyp, sot sanktsııasymen eki aıǵa qamaýǵa alyndy. Atalǵan qylmysqa basqa da tulǵalardyń qatystylyǵyn anyqtaýǵa baǵyttalǵan tergeý áreketteri júrgizilýde. Ózge aqparattar QPK 201-babynyń talaptaryna sáıkes jarııa etýge jatpaıdy» - delingen Túrkistan oblysynyń prokýratýrasy taratqan aqparatta.
