Túrkistan oblysynda bilim bóliminiń basshylary men býhgalterler 4 mlrd teńge jymqyrǵan

TÚRKІSTAN. KAZINFORM – Túrkistan oblysy Jetisaı aýdandyq bilim bóliminiń 46 qyzmetkeri memleket qarajatyn asa iri kólemde ıemdengeni úshin qylmystyq jaýapkershilikke tartyldy. 

Qylmystyq is Túrkistan oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen qaraldy.

Sot anyqtaǵandaı, 2021–2023 jyldar aralyǵynda bólimniń basshylary men mektep býhgalterleri birlesip, mektepterde jumys istemeıtin adamdardyń atyna jalaqy aýdarý arqyly bıýdjet qarajatyn jymqyrǵan. Qylmystyq áreketterdiń saldarynan memleketke 4 mıllıard teńgeden astam shyǵyn kelgen.

Іs boıynsha negizgi aıyptalýshylar:

— bólim basshysy M. QK-niń 189-babynyń 4-bóligi 2-tarmaǵymen (asa iri kólemde senip tapsyrylǵan múlikti ıemdený) aıyptaldy;

— bólim basshysy Sh. QK-niń 189-babynyń 4-bóligi 2-tarmaǵymen (asa iri kólemde senip tapsyrylǵan múlikti ıemdený), 28-babynyń 4-bóligimen, 367-babynyń 4-bóligimen (asa iri kólemde para berýge aıdap salý) aıyptaldy;

— bólim esepshisi Sh. QK-niń 189-babynyń 4-bóligi 2-tarmaǵymen (asa iri kólemde senip tapsyrylǵanmúlikti ıemdený), 218-babynyń 3-bóliginiń 3-tarmaǵymen (asa iri mólsherde qylmystyq jolmen alynǵan múlikti zańdastyrý) aıyptaldy;

— 43 esepshi QK-niń 189-babynyń 4-bóliginiń 2-tarmaǵymen aıyptalǵan (asa iri kólemde senip tapsyrylǵan múlikti ıemdený).

Sot úkimi boıynsha:

Negizgi sottalýshy Sh. men M.-ǵa tıisinshe 9-jyl jáne 10 jyl bas bostandyǵynan aıyrý túrindegi jaza taǵaıyndaldy.

QK-niń 74-babynyń talaptaryna sáıkes, Sh.-nyń kámeletke tolmaǵan balasynyń bolýyna baılanysty, jazanyń óteý merzimi 5 jylǵa keıinge qaldyryldy.

— 2 sottalýshynyń áreketi QK-niń 371-babynyń 1-bóligine qaıta saralanyp, olarǵa 1 jyl merzimge bas bostandyǵyn shekteý túrindegi jaza taǵaıyndaldy.

— 34 sottalýshyǵa QK-niń 189-babynyń 4-bóliginiń 2-tarmaǵymen jalpy 5 jyldan 8 jylǵa deıin merzimge bas bostandyǵynan aıyrý túrindegi jaza taǵaıyndaldy.

Onyń ishinde: 

— 4 sottalýshyǵa QK-niń 74-babynyń talaptaryna sáıkes, kámeletke tolmaǵan balalarynyń bolýyna baılanysty, olardyń jazany óteý merzimin 5 jylǵa keıinge qaldyrdy;

— 18 sottalýshyǵa QK-niń 63-baby negizinde taǵaıyndalǵan jaza shartty dep esepteldi;

— 12 sottalýshyǵa naqty merzim taǵaıyndaldy.

— 8 sottalýshyǵa QK-niń 189-babynyń 2-bóliginiń 1-tarmaǵymen/189-babynyń 3-bóliginiń 1-tarmaǵymen 1 jyldan 3 jylǵa deıin bas bostandyǵyn shekteý jazasy taǵaıyndaldy. 

Shyǵyndy óndirý jáne onyń mólsherin anyqtaý, azamattyq sot isin júrgizý tártibine qaldyryldy

- Jeńildetetin mán-jaı retinde sottalýshylardyń jasy, otbasylyq jaǵdaıy, buryn sotty bolmaǵany jáne keltirilgen shyǵynnyń bir bóligin qaıtarýy esepke alyndy. Atap aıtqanda, 43 sottalýshy 800 mln teńgeden astam qarjyny memleketke qaıtarady. Shyǵyndy tolyq óndirip alý jáne onyń mólsherin naqtylaý azamattyq sot óndirisi sheńberinde qaralatyn bolady. Úkim áli zańdy kúshine engen joq, - delingen sot habarlamasynda.