Túrkistan oblysynda bilim bóliminiń basshylary 29 mln teńge jymqyrǵan

ASTANA. KAZINFORM – Sońǵy 6 jylda áleýmettik qamsyzdandyrý salasynda 574 qylmys tirkelip, 141 adam sottaldy. Bul týraly Sybaılas jemqorlyqqa qarsy is-qımyl agenttigi málimdedi.

Derekke qaraǵanda, Túrkistan qalalyq soty Saýran aýdanynyń bilim bóliminiń basshylary A.Batyrbekovaǵa, T.Shegenbaevqa, býhgalterler B.Janáli men A.Parmenovqa qatysty úkim shyǵardy. Olar bilim berý salasynda naqty jumys istemegen adamdarǵa jalaqy retinde aýdarý arqyly 29 mln teńge somasynda bıýdjet qarajatyn jymqyrǵany úshin kináli dep tanyldy.

Batyrbekova men Shegenbaev 7 jylǵa bas bostandyǵynan aıyrylsa, Janáli men Parmenovtyń sol merzimge bas bostandyǵyn shektedi.

- Shymkent qalasynyń qylmystyq ister jónindegi aýdanaralyq soty «Shymkent qalasy boıynsha Eńbek jáne áleýmettik qorǵaý komıtetiniń departamenti» RMM bólim basshysynyń mindetin ýaqytsha atqarýshy D.Begalaevaǵa jáne «№12 qalalyq emhana» ShJQ MKK medbıkesi G.Irbaevaǵa qatysty úkim shyǵardy.

Begalaeva birneshe ret para alǵany úshin, Irbaeva múgedektik toptaryn keliskeni úshin múmkindigi shekteýli balalardyń ata-analarynan jalpy somasy 500 myń teńgege para alýda birneshe ret deldaldyq jasaǵany úshin kináli dep tanyldy, - dep jazdy agenttikten.

Sot úkimimen Begalaeva men Irbaeva tıisinshe 23,3 mln teńge jáne 10 mln teńge kóleminde aıyppul salýǵa sottaldy.

Sondaı-aq, Atyraý qalasynyń №2 sotymen qalalyq bilim bóliminiń sektor meńgerýshisi M.Seıtqalıevaǵa jáne basqalarǵa qatysty úkim jarııalandy. Ol jergilikti mektepterdiń biriniń ýaqytsha dırektory A.Qoıshyǵulova arqyly úsh muǵalimnen «sarapshy» sanatyn bekitý úshin jalpy somasy 150 myń teńge para alǵany úshin kináli dep tanyldy.

Sot úkimimen olarǵa 1,4 mln teńgeden 4,5 mln teńgege deıin aıyppul túrinde jaza taǵaıyndaldy. Budan basqa, sottalǵandar memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıy aıyrylady.

Sot aktileri zańdy kúshine engen joq.

QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady.

Aıta keteıik, Aqmola oblysynda balabaqsha esepshisi 9 mln teńgeni jymqyrǵany anyqtaldy.