Túrkistan oblysynda bıoqospalar óndiretin zaýyt salý josparlanyp otyr
ASTANA. KAZINFORM – Memleket basshysy Orzax Group basqarma tóraǵasy Selman Alımoǵlyny qabyldady. Bul týraly Aqordanyń baspasóz qyzmeti habarlady.
Álemdegi bıologııalyq belsendi qospalar naryǵynda kóshbasshylardyń biri sanalatyn kompanııa basshylyǵymen kezdesýde birlesken jobalardy júzege asyrý máselesi qarastyryldy.
Qasym-Jomart Toqaev Orzax Group kompanııasynyń Túrkistan oblysynda bıologııalyq belsendi qospalar óndiretin zaýyt salý sheshimine qoldaý bildirip, bul bastama otandyq farmatsevtıka salasyn ártaraptandyrýǵa jáne elimizdiń eksporttyq áleýetin arttyrýǵa eleýli úles qosatynyn atap ótti.
Selman Alımoǵly kompanııanyń Qazaqstanda óndiristik bazany keńeıtýmen ǵana shektelmeı, ǵylymı-zertteý jáne ınnovatsııa baǵyttaryn da damytýǵa nıetti ekenin jetkizdi.
Búgingi tańda Orzax Group bıologııalyq belsendi qospalardyń 150 túrin óndirip, álemniń 60 eline eksporttaıdy. Qazaqstandaǵy óndiris jobasyna kompanııa 40 mıllıon dollar ınvestıtsııa quıyp, 500 adamdy turaqty jumyspen qamtýdy josparlap otyr.
Eske sala keteıik, buǵan deıin Memleket basshysy Tiryaki Holding kompanııasynyń atqarýshy dırektory Súleımen Tırıakıoǵlyny qabyldady.