Túrkistan oblysynda bıyl qansha qasqyr men shıbórini atýǵa ruqsat berildi
TÚRKІSTAN. KAZINFORM — Ótken jylǵy sanaq qorytyndysy boıynsha oblys aýmaǵynda qasqyr sany — 609, al shıbóri 4051-ge jetken.
Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Bahyt Mýsalıevtyń aıtýynsha, 2026 jylǵy 1 qańtar men 31 jeltoqsan aralyǵyna arnalǵan bıologııalyq negizdeme jobasyna sáıkes, óńirde 243 qasqyrdy, 2025 shıbórini atýǵa ruqsat berilgen.
— Aýmaqtyq ınspektsııaǵa «Sany retteýge jatatyn janýarlar túrlerin alyp qoıýǵa ruqsat berý» memlekettik qyzmeti boıynsha jeke tulǵalardan 2781 ótinish tústi. Onyń ishinde 1446 ótinim boıynsha qasqyr men shıbóri sanyn retteýge ruqsat berildi. Al 1335 ótinimge dáleldi bas tartý jasaldy, — dedi spıker.
Túz taǵylarynyń sanyn retteý jumystary ákimdikterge qarasty bos jerler men rezervtik ańshylyq alqaptarda erkin túrde, sondaı-aq bekitilgen ańshylyq sharýashylyq ýchaskelerinde ıeleriniń kelisimimen júrgiziledi.
Qasqyr men shıbórini aýlaý qyzmeti tolyǵymen (www.elicense.kz veb-portaly) avtomattandyrylǵan. Atalǵan memlekettik qyzmet elektrondyq formatta adam qatysýynsyz kórsetiledi.
Eske sala ketsek, aýyldyq jerlerde jyrtqyshtardyń shabýyl jasaý jaıttary tirkelip turady. Atap aıtsaq, Báıdibek aýdanynda jaıylymdaǵy malǵa qasqyr shapty.
Sondaı-aq Otyrar aýdanynda shıbóri aýyl ishine kirip, úsh adamdy jaraqattady.
