Túrkistan oblysynda bıyl qansha eldi mekenniń sý qubyry jańartylady
TÚRKІSTAN. KAZINFORM — Túrkistan oblysynda aýyz sý salasyndaǵy birqatar másele áli de ózekti. Olardy sheshý maqsatynda 2026-2028 jyldarǵa arnalǵan arnaıy is-sharalar jospary bekitilgen.
Josparǵa sáıkes, bıyl Arys qalasy men Saýran, Maqtaaral, Shardara jáne Qazyǵurt aýdandaryndaǵy 10 eldi mekende turatyn 45,7 myń turǵyn táýlik boıy aýyz sýmen qamtamasyz etiledi.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Toqtar Ýsýbalıevtiń aıtýynsha, qalǵan eldi mekenderdegi máseleler kezeń-kezeńimen sheshilip, qajetti jobalar qarjylandyrýǵa usynylady.
— Bıyl jalpy sıpattaǵy transfertter esebinen 36 aýyz sý nysanynyń qurylysyna 15,6 mlrd teńge bólindi. Onyń ishinde jyl sońyna deıin 10 nysan paıdalanýǵa beriledi. Nátıjesinde tozyǵy jetken 7 eldi mekendegi sý qubyrlary tolyq jańartylyp, taǵy 7 eldimekenniń 32,7 myń turǵyny táýlik boıy aýyz sýmen qamtylady. Qalǵan 26 nysannyń qurylysy kelesi jylǵa ótpeli, — dedi ol.
Sonymen qatar oblystyq bıýdjet esebinen aǵymdaǵy jóndeý jumystary da jalǵasyp jatyr. Bıyl bul maqsatqa 2,7 mlrd teńge bólinip, 27 nysanda jumys qolǵa alynǵan. Jyl sońyna deıin 21 eldi mekenniń tozyǵy jetken sý qubyrlary jańartylady.
Budan bólek óńirde «Energetıkalyq jáne kommýnaldyq sektorlardy jańǵyrtý» ulttyq jobasy aıasynda 2025-2029 jyldary aýyz sý jáne sý burý júıelerin jańǵyrtýǵa 42,9 mlrd teńge qarastyrylǵan. Onyń ishinde 34,5 mlrd teńge aýyz sý jelilerine baǵyttalyp, 511 shaqyrym sý qubyry jańartylady.
Vedomstvo málimetinshe, 2029 jylǵa qaraı oblystaǵy aýyz sý jelileriniń tozý deńgeıi qazirgi 34,7 paıyzdan 28,7 paıyzǵa deıin tómendeıdi.
Buǵan deıin Túrkistan oblysynda 10 sý kanaly memleket menshigine qaıtarylǵany týraly jazǵan edik.
