Túrkistan oblysynda bıyl qansha eldi meken gazben qamtylady

TÚRKІSTAN. KAZINFORM – Oblysta 2027 jylǵa deıin 161 eldimekendi tabıǵı gazben qamtamasyz etý josparlanyp otyr.

Túrkistan oblysy energetıka jáne turǵyn úı-kommýnaldyq sharýashylyq basqarmasynyń málimetinshe, ótken jyly óńirde gazben qamtý maqsatynda 87 nysannyń qurylysyna 20,7 mlrd teńge bólingen.

Onyń ishinde 45 nysannyń qurylysy byltyr aıaqtalyp, 41 eldimekende 70 myń turǵyn kógildir otynǵa qol jetkizdi. Ótken jyldyń qorytyndysymen 800-den astam eldimekenniń 606-na gaz jetkizilip, qamtý kórsetkishi 88,7 paıyzǵa jetti.

– Bıyl oblysta 74 nysannyń qurylysy júrgizilip, 33 nysandy aıaqtaý josparlanǵan. Oǵan respýblıkalyq jáne oblystyq bıýdjetten 13,7 mlrd teńge bólindi. Nátıjesinde 34 eldimekende 19 663 turǵyn gazben qamtylady. Al qalǵan 41 nysan 2027 jylǵa ótpeli. Bıyl óńirde gazben qamtý kórsetkishi 89,6 paıyzǵa jetedi dep mejelenip otyr, – dedi basqarmanyń bólim basshysy Qýanysh Ómirálıev.

Onyń aıtýynsha, óńirdegi eldimekenderdi 100 paıyz tabıǵı gazben qamtamasyz etý maqsatynda, oblys ákimdigimen 2023-2027 jyldarǵa arnalǵan is-shara jospary bekitilgen.

– Óńirde keıbir eldimekenderde halyq sany óte az, mysaly eldimeken sanatyndaǵy bir aýylda tek 12 úı ǵana bar. Sol sebepti bul jerlerge gaz júrgizý ekonomıkalyq turǵydan tıimdi emes. Qazirgi tańda mundaı 36 eldimeken anyqtalǵan. Jalpy josparǵa sáıkes, 161 eldimekendi 2027 jyly tabıǵı gazben qamtamasyz etý kózdelgen, – dedi spıker.

Budan buryn Túrkistan oblysynda qys ortasynda 170-ten astam úı gazsyz qalǵanyn jazǵan edik.