Túrkistan oblysynda bıyl 900-ge jýyq azamat «qandas» mártebesin aldy

TÚRKІSTAN. KAZINFORM – 9 aı ishinde 472 otbasyn qurap otyrǵan 875 etnıkalyq qazaq Túrkistan oblysyna qonys aýdarǵan. Nátıjesinde olarǵa «Qandas» mártebesi berilgen.

Ózbekstannan - 853, Tájikstannan - 11 jáne basqa memleketterden - 11 adam óńirge kóship kelgen. Qonys aýdarǵan etnıkalyq qazaqtardyń 345-i Saryaǵash aýdanyna, 138-i Ordabasy aýdanyna, 121-i Qazyǵurt aýdanyna, 119-y Keles aýdanyna, 73-i Saıram aýdanyna, 24-i Jetisaı aýdanyna, 14-i Túlkibas aýdanyna, 23-i Maqtaral aýdanyna, 13-i Túrkistan qalasyna jáne 5 adam basqa aýdan-qalalarǵa qonystanǵan.

Etnıkalyq qonys aýdarýshylardyń 498-i eńbekke jaramdy. Onyń ishinde jaldamaly jumysshylar -17, ózin-ózi jumyspen qamtyǵandar -175, jumyssyzdar nemese jumys izdeýshiler -154 jáne basqa da sanattaǵylar 152 adam.

Al, ishki kóshi-qon máselesine keletin bolsaq, Eńbek jáne halyqty áleýmettik qorǵaý mınıstrligi 2024 jylǵa respýblıka boıynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblysty belgiledi. Olar - Abaı, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary.