Túrkistan oblysynda bıyl 3 myńnan astam azamat áskerge shaqyrylady
TÚRKІSTAN. KAZINFORM — Túrkistan oblysynda 18 jáne 27 jas aralyǵyndaǵy azamattardy kóktemgi áskerge shaqyrý naýqany 2026 jyldyń 1 naýryzynan bastalady.
Túrkistan oblysy qorǵanys isteri jónindegi departamentiniń málimetinshe, 2025 jyly kóktemgi jáne kúzgi shaqyrý naýqandary josparly túrde ótken. Byltyr oblystan 5 myńnan astam jas azamat Otan aldyndaǵy boryshyn óteýge attanǵan.
Al bıyl óńirden 3 myńnan astam áskerge shaqyrylýshyny Qarýly kúshter men ózge de áskerı qurylymdar qataryna jiberý josparlanyp otyr. Qazirgi ýaqytta qalalyq jáne aýdandyq jergilikti áskerı basqarý organdary shaqyrylýshylardy zerdeleý jumystaryn júrgizip jatyr.
— Búginde ásker qatarynda qyzmet etýge nıetti jastar az emes. Biri Otandy qorǵaýdy azamattyq paryzym dep bilse, endi biri áskerı qyzmettiń áleýmettik jeńildikteri men múmkindikterin eskeredi. Oqý ortalyqtarynda áskerı-eseptik mamandyqtar boıynsha daıarlyqtan ótken azamattarǵa memlekettik úlgidegi kýálikter beriledi. Áskerge shaqyrý naýqany barynsha ashyq ári qolaıly formatta uıymdastyrylǵan. Shaqyrylýshylarǵa jeke shaqyrý qaǵazdary jiberilip, sondaı-aq 1414 biryńǵaı baılanys ortalyǵy arqyly SMS-habarlamalar joldanady, — dep málim etti departament ókilderi.
Vedomstvonyń málimdeýinshe, merzimdi áskerı qyzmetin ótegen sarbazdarǵa joǵary bilim alý barysynda birneshe jeńildik qarastyrylǵan.
— Merzimdi áskerı qyzmetten keıingi 2 jyl ishinde UBT-ny esepke almaı, tek áńgimelesý nátıjesi boıynsha aqyly negizde joǵary oqý oryndaryna túsýge múmkindik bar. Eń laıyqty áskerı qyzmetshiler JOO-dardyń granttary esebinen tegin joǵary bilim (onyń ishinde joǵary bilimnen keıingi bilim) ala alady. Sondaı-aq emtıhansyz grant negizinde JOO-nyń áskerı kafedrasyna túsýge bolady, bul ofıtser ataǵyn alý úshin arnalǵan. Qyzmette eń úzdik kórsetkishke jetken áskerı qyzmetshiler emtıhansyz jáne UBT-ny esepke almaı Qorǵanys mınıstrliginiń áskerı oqý oryndaryna qabyldana alady, — delingen departamenttiń usynǵan aqparatynda.
Budan buryn áskerge shaqyrý tolyq avtomattandyrylatynyn jazǵan edik.