Túrkistan oblysynda bıyl 120 myńǵa jýyq jumys orny qurylady
TÚRKІSTAN. KAZINFORM - Túrkistan oblysy ákimimen bekitilgen «Óńirdiń jumyspen qamtý kartasy» boıynsha bıyl 118,9 myń jumys ornyn ashý josparlanyp otyr. Atalǵan joba aıasynda jyl basynan beri 68,5 myń adam jumyspen qamtý sharalaryna qatysqan. Onyń ishinde 31 myń adam turaqty jumysqa ornalassa, 37,5 myń adam sýbsıdııalanǵan ýaqytsha jumys oryndarymen qamtyldy. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva málimdedi.
Óńirdegi 1500 jumyssyz ulttyq jobalar men tujyrymdamalar boıynsha jumysqa tursa, 320 adam jeke ınvestıtsııalyq jobalar boıynsha jumys tapqan. Sondaı-aq, jańa bıznes ıdeıalardy iske asyrý maqsatynda 1783 adam grant alyp, óz kásipterin bastap otyr.
«Jyl basynan beri 5 388 adam grant alýǵa ótinim bildirdi. Komıssııa sheshimine sáıkes 1 783 turǵynǵa grant berilip, 2 570,9 mln. teńge ıgerildi. Bir orynǵa 3 adamnan tústi. Birinshi lekte oblys ákiminiń tapsyrmasyna sáıkes, 7 aýdan, qalaǵa pılottyq jobalardy júzege asyrý maqsatynda 120 grant berý josparlanǵan bolatyn. Sol kezde naqty 95 adam qaıtarymsyz qarjy aldy. Al, ekinshi kezeń shilde aıynda ótti. Onyń ishinde pılottyq joba boıynsha Saıram aýdany men Túrkistan qalasyndaǵy 25 adamǵa grant berildi», - dedi basqarma basshysy.
Túrkistan oblysynda kóp balaly otbasylar sany 185 690 adamdy nemese respýblıkanyń barlyq kóp balaly analarynyń tórtten bir bóligin quraıdy. Sondyqtan óńirde az qamtylǵan azamattardyń tabysyn arttyrý arqyly kedeılikti tómendetýge baǵyttalǵan jumystar bıyl da jalǵasyp jatyr. Jalpy óńirde kedeılik deńgeıin 5,5%-ǵa deıin nemese 2023 jylmen salystyrǵanda 25%-ǵa tómendetý mejelenip otyr.
«Bıyl 116,2 myń adamdy ataýly áleýmettik kómekpen qamtamasyz etýge bıýdjetten 9,6 mlrd.teńge bólindi. Sondaı-aq, kedeılik deńgeıin tómendetý jóninde aýdan, qala ákimderimen memorandýmdar túzilip, ataýly áleýmettik kómek kórsetýdiń 2024 jylǵa toqsan saıynǵy jospary bekitildi. Jyl basynan beri 14 160 otbasyǵa nemese 84 860 adamǵa ataýly áleýmettik kómek taǵaıyndaldy. ıAǵnı, kórsetkish 19 563 adamǵa tómendep otyr. Az qamtylǵan azamattardyń úlesi jalpy oblys halqynyń 4 paıyzyn quraıdy. 2023 jyldyń tıisti kezeńimen salystyrǵanda az qamtylǵan azamattardyń sany 61 224 adamǵa nemese 41,9 paıyzǵa tómendedi», - dedi Ásııa Temirbaeva.
Búgingi kúni óńirde 97 280 múgedektigi bar azamat esepte turady. «AMANAT» partııasynyń «Halyqpen birge» atty saılaýaldy baǵdarlamasyndaǵy basymdyqtardy oryndaý maqsatynda ótken jyly 607 nysan beıimdeý sharalarymen qamtylǵan. Bul maqsatta 154,7 mln. teńge qaralyp otyr. Alaıda, jergilikti bıýdjet esebinen qarjy múldem qaramaǵan nemese qaralǵan qarjy kólemi mardymsyz birqatar aýdandarda bar. Sala mamandarynyń aıtýynsha, bul óz kezeginde beıimdeý jumystaryn sapaly oryndaýǵa keri áserin tıgizedi.
«Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasyna baǵynysty arnaýly áleýmettik qyzmetter kórsetýge arnalǵan 12 ortalyq bar. Onyń ishinde, 4 statsıonarlyq úlgidegi jáne 6 jartylaı statsıonarlyq úlgidegi mekemeler jáne «Ardagerler úıi» KMM men «Arnaýly kásiptik kolledji» KMM jumys isteıdi. Jyl basynan beri 1 064 adam basqarmaǵa baǵynysty ortalyqtarda áleýmettik qyzmet aldy» - dedi Ásııa Temirbaeva.
Búginde óńirde 200 oryndyq eresek múgedektigi bar adamdardy ońaltý ortalyǵy jáne 50 oryndyq psıhonevrologııalyq aýytqýy bar múgedek balalarǵa arnaýly áleýmettik qyzmetter kórsetý ortalyǵynyń qurylysy júrip jatyr. Sondaı-aq, «№ 6 arnaýly áleýmettik qyzmetter kórsetý ortalyǵy» KMM-si qurylyp, jumysyn bastaýda. Jeke kásipker esebinen aýtızm jáne basqa da mentaldy buzylýlary bar balalarǵa arnalǵan ortalyqtar qurý jobasy da iske qosylmaq.
