Túrkistan oblysynda bıdaı óńdeıtin zamanýı zaýyt jańǵyrtylyp, iske qosyldy
TÚRKІSTAN. KAZINFORM - Túrkistan oblysynda aýyl sharýashylyǵy ónimderin tereń óńdeý baǵytynda qarqyndy jumys júrip jatyr. Maqsat – eksport kólemin ulǵaıtý.
Túlkibas aýdanynda «MK ALTYN NAN» JShS-nyń un shyǵaratyn zaýyty qaıta jańǵyrtylyp, iske qosyldy. Mańyzdy dıirmen kesheniniń júmysymen Túrkistan oblysynyń ákimi Nuralhan Kósherov arnaıy tanysty.
Oblys basshysy dıirmen kesheni ujymymen kezdesýde óńirde agroónerkásip keshenin damytý, aýyl sharýashylyǵy ónimderin qaıta óńdeý baǵytyndaǵy jobalarǵa erekshe kóńil bólinip otyrǵanyn atap ótti. Mundaı óndiris oryndarynyń iske qosylýy aýdan ekonomıkasyn nyǵaıtyp, jańa jumys oryndaryn ashýǵa jáne halyqtyń ál-aýqatyn arttyrýǵa yqpal etetinin jetkizdi.
– Memleket basshysy Qasym-Jomart Kemeluly Toqaev óz Joldaýlarynda aýyl sharýashylyǵyn damytyp, ónimdi óńdeý úlesin arttyrýdy tapsyrdy. Іske qosylyp otyrǵan bul keshen – sol naqty tapsyrmalardyń jergilikti deńgeıde júzege asýynyń aıqyn kórinisi. Qaıta jańǵyrǵan kásiporyn – oblystyń óndiristik áleýetin arttyryp, aýyl sharýashylyǵy ónimderin tereń óńdeýge jol ashatyn mańyzdy joba. Jańartylǵan zaýyt sapaly ári básekege qabiletti ónim óndirip, oblystyń áleýmettik-ekonomıkalyq damýyna serpin beredi dep senemin. Osy jobanyń júzege asýyna úles qosqan ınvestorlarǵa alǵysymdy bildiremin. Jobany keńeıtýge qoldaý kórsetýge daıynbyz, – dedi Nuralhan Kósherov.
Atalǵan kásiporyn bıdaı ónimin óńdeýge baǵyttalǵan. Zaýyt alǵash ret 1986 jyly iske qosylyp, 2018 jyly toqtap qalǵan. 2024 jyldyń jeltoqsan aıynda kásiporyn tolyqtaı qaıta jańǵyrtylyp, óndiristik qýaty men tehnologııalyq múmkindikteri arttyryldy. Bul rette memlekettik qoldaýdy paıdalanyp, nesıe alǵan. Qazirgi tańda zaýyt jylyna 120 myń tonna bıdaı ónimin óńdeýge qaýqarly. Kásiporynda 140 adam turaqty jumyspen qamtylǵan. Dıirmen kesheni basshylyǵy jobany keńeıtip, ónim kólemin arttyrýdy kózdep otyr.
Túlkibasta shyǵarylǵan un Qazaqstan Respýblıkasynyń ishki naryǵymen birge Ózbekstan, Túrikmenstan jáne Aýǵanstanǵa eksporttalyp jatyr. Túlkibas aýdanynda iske qosylǵan bul zaýyt óńirdiń azyq-túlik qaýipsizdigin qamtamasyz etýge jáne agrarlyq salanyń damýyna óz úlesin qosa bermek.
