Túrkistan oblysynda beınekamera, medıtsınalyq jıhaz, turmystyq hımııalyq buıymdar shyǵarylmaq
ASTANA. KAZINFORM — Otandyq óndiristi damytý jáne qaıta óńdeýdi qoldaý maqsatynda Túrkistan oblysynda «Shaǵyn óndiristik park» jobasy qolǵa alyndy. Onda 238 gektar aýmaqta 21 shaǵyn óndiristik alań quryldy. Bul týraly Túrkistan oblysynyń ákimi Nuralhan Kósherov aıtyp berdi.
Ákimniń aıtýynsha, negizgi baǵyttar retinde qurylys materıaldary, jıhaz, plastık buıymdary, hımııa ónimderi óndiristeri men jeńil ónerkásip aıqyndalǵan.
— Joba aıasynda 248 ǵımarat salyp, 5 myńǵa jýyq jumys ornyn qurý josparlanǵan. Qazirgi ýaqytta 40 ǵımarat salynyp, 32 joba iske qosyldy. 2 myńǵa jýyq jumys orny ashyldy, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Park aýmaǵynda jıhaz, jańbyrlatyp sýarý, sýsyn, muzdatqysh jáne qurylys zattaryn shyǵaratyn óndirister ashyldy.
— Aldaǵy ýaqytta beınekamera, medıtsınalyq jıhaz, turmystyq hımııalyq buıymdarmen elimizdi qamtamasyz etýge jáne eksportqa shyǵarýǵa múmkindik bolady, — deıdi oblys ákimi.
Jalpy bıylǵy 10 aıda oblystaǵy ónerkásip ónimi kólemi 1,3 trln teńgege jetip, ósim deńgeıi 113,4 paıyzdy qurady. Ósim qarqyny boıynsha respýblıkada alǵashqy bestikke engen.
Aıta keteıik, Ózbekstanmen júrgizilgen kelissózder nátıjesinde Túrkistan oblysynda 100 gektar aýmaqta «Ortalyq Azııa halyqaralyq kooperatsııa ortalyǵy» quryldy.
Buǵan deıin Túrkistan oblysynyń ákimi ımportty almastyratyn 20 joba iske asyrylyp jatqanyn aıtqan edi.