Túrkistan oblysynda bes jyl boıy halyqaralyq izdeýde júrgen sheteldik ustaldy
ASTANA. KAZINFORM — Túrkistan oblysynda polıtsııa qyzmetkerleri bes jyl boıy halyqaralyq izdeýde júrgen 44 jastaǵy shetel azamatyn ustady. Bul týraly Polisia.kz jazdy.
Er adam Maqtaaral aýdanynda kóshi-qon zańnamasynyń saqtalýyn tekserý barysynda anyqtalǵan. Jedel-izdestirý is-sharalarynyń nátıjesinde ol júrgen jerinen ustalyp, polıtsııa bólimine jetkizildi.
— Tekserý barysynda shetel azamatynyń buǵan deıin urlyq jasaǵany úshin sottalǵany jáne 2021 jyldan beri halyqaralyq izdeýde júrgeni anyqtaldy. Qazirgi tańda ol qamaýǵa alyndy, — delingen habarlamada.
Sonymen qatar «Mıgrant» jedel-profılaktıkalyq is-sharasy barysynda Túrkistan oblysynyń aýmaǵynda zańsyz eńbek qyzmetin júzege asyrǵan 26 shetel azamaty anyqtaldy.
Quqyq buzýshylarǵa qatysty ákimshilik sharalar qabyldanyp, olardyń 16-sy Qazaqstan Respýblıkasynyń aýmaǵynan shyǵaryldy. Polıtseıler kóshi-qon zańnamasyn buzý faktilerin anyqtaý jáne quqyq buzýshylyqtardyń aldyn alý baǵytyndaǵy jumystardy jalǵastyrmaq.
Aıta keteıik, buǵan deıin Túrkistanda erli-zaıyptylardyń ólimine qatysty tergeý júrip jatqanyn habarladyq.
