Túrkistan oblysynda belgisiz adamdar áskerı nysanǵa basyp kirmek boldy

TÚRKІSTAN. KAZINFORM – Oqıǵa Túrkistan oblysyndaǵy Arys qalasynda ornalasqan Qarýly Kúshterdiń áskerı bóliminiń aýmaǵynda bolǵan, dep habarlaıdy Kazinform agenttiginiń tilshisi.

Resmı aqparatqa sáıkes, qarýly kúzettegi kezekshi qaraýyl belgisiz bir top adamnyń rejımdik nysanǵa jaqyndaýǵa tyrysqanyn der kezinde baıqap, Qaraýyl qyzmeti jarǵysynyń talaptaryna sáıkes áreket etken.

Operatıvti áreketter nátıjesinde quqyq buzýshylar toqtatyldy.

— Oqıǵanyń mán-jaıyn quzyrly organdar tekserip jatyr, — dep habarlady Shymkent garnızonynyń baspasóz qyzmeti.

Ustalǵan adamdardyń jeke tulǵalary men áreket etý sebepteri anyqtalyp jatyr. 

Aldyn ala boljamdardyń biri boıynsha, oqıǵa tústi metall urlaý áreketimen baılanysty bolýy múmkin.

Naqty qorytyndy tergeý nátıjesinde jarııalanady.

Jalpy áskerı jarǵylarǵa sáıkes, qaraýyl óz postyna nemese tyıym salynǵan shekaraǵa jaqyndaǵan kez kelgen adamdy:

«Toqta!», «Keri shegin!», nemese «Oń (sol) jaqpen aınalyp ót!» dep toqtatýy tıis.

Eger bul talap oryndalmasa, ol:

«Toqta, atamyn!» dep eskertip, dereý qaraýyl bastyǵyn shaqyrady.

Buıryqqa baǵynbaǵan jaǵdaıda qaraýyl eskertý retinde aspanǵa oq atady, al eger buzyp ótýge áreket jasalsa — qarý qoldanýǵa quqyly.

Eger qaraýyldyń ózine nemese kúzetiletin nysanǵa tikeleı shabýyl jasalsa, ol qarýdy eskertýsiz qoldana alady.

Qazaqstan Respýblıkasynyń Qorǵanys mınıstrligi áskerı nysandar arnaıy quqyqtyq rejımi bar aımaqtarǵa jatatynyn eskertedi.

Olarǵa zańsyz kirý — aýyr quqyq buzýshylyq bolyp tabylady jáne qylmystyq jaýapkershilikke ákep soǵady.