Túrkistan oblysynda báısheshek gúldep, saryshunaqtar ininen shyǵa bastady

TÚRKІSTAN. KAZINFORM — Ońtústik óńirde kóktemniń alǵashqy nyshany bilinip jatyr.

Áleýmettik jelide ininen shyqqan saryshunaqtardyń sýreti tarady. Sondaı-aq, báısheshektiń gúldep turǵan sýreti jarııalandy. Foto men vıdeo «Syrdarııa-Túrkistan» memlekettik óńirlik tabıǵı parkiniń aýmaǵynda túsirilgen. Al, tabıǵat janashyrlary bul qalypty qubylys degen baǵa berip otyr. 

— Báısheshekter jyl saıyn qańtar aıynyń ortasynda gúldep qoıatyn. Bıyl aqpan aıynyń basynda gúldep jatyr. Túngi mezgil salqyn bolǵandyqtan bıyl kesh gúldedi. Jalpy, qysta báısheshektiń búr jarýy Ońtústik tabıǵaty úshin qalypty jaǵdaı, — deıdi «Syrdarııa-Túrkistan» memlekettik óńirlik tabıǵı parkiniń ǵylym, aqparat jáne monıtorıng bóliminiń meńgerýshisi Nurıla Jaýynbaıqyzy.

Al, saryshunaqtar bıyl Shardara aýdanynyń aýmaǵynda erte kóringen. Tabıǵat qorǵaýshylardyń sózine súıensek, oblystyń basqa aımaǵynda áli de uıqydan turmaǵan.

— Jazda durys semire almaǵan, maı jınaı almaǵan saryshunaqtar kún kishkene jylynsa ininen shyǵa beredi. Kún sýysa uıyqtaı salady. Jalpy janýarlar kóktemniń erte keletinin sezedi. Bıyl saryshunaqtar jyldaǵydan az. Degenmen, qańtar aıynyń sońynan bastap erte kóktemde keletin bir-eki qus paıda boldy. Bul bizdiń qyzyǵýshylyǵymyzdy týdyryp otyr. Sondyqtan zertteý jumystaryn júrgizip jatyrmyz, — dedi Nurıla Jaýynbaıqyzy.

Aıta keteıik, budan buryn Túrkistanda aǵashtar búrshik ata bastaǵanyn jazǵan bolatynbyz.