Túrkistan oblysynda bıyl Báıdibek ata sý qoımasy salyna bastaıdy
TÚRKІSTAN. KAZINFORM - Sý resýrstary jáne ırrıgatsııa mınıstri Nurjan Nurjigitov Túrkistan oblysy Jetisaı jáne Maqtaaral aýdandarynyń sharýalarymen kezdesti.
Nurjan Nurjigitov Túrkistan oblysynda «Báıdibek ata» sý qoımasy salynatynyn aıtty.
Sý resýrstary jáne ırrıgatsııa mınıstrligi qurylysty osy jyldyń sońyna deıin bastaýǵa nıetti.
Sondaı-aq, oblysta sýarýdyń únemdi júıelerin daıyndaýmen jáne ornatýmen aınalysatyn ózbekstandyq OMAD Start kompanııasynyń zaýytyn salý josparlanyp otyr.
Bul týraly sharýalarmen kezdesýge qatysqan kásiporyn basshysy Shahobıddın Karomov málimdedi.
Nurjan Nurjigitov «Qazsýshar» memlekettik kásipornynyń jergilikti fılıalynyń jumysy týraly baıandamany tyńdaǵan soń sharýalardyń suraqtaryna jaýap berdi.
Atap aıtqanda, Shardara sý qoımasynan «Dostyq» magıstraldy kanalyna deıin sý jiberetin mashına kanalyn jóndeýge, óńirdiń ırrıgatsııalyq kanaldaryn rekonstrýktsııalaýǵa, betondaýǵa jáne tazartýǵa, Aral teńizin qalpyna keltirýge, IDJJ-3 jobasyna (ırrıgatsııalyq jáne drenajdyq júıelerdi jetildirý) qosymsha obektilerdi qosýǵa jáne jekelegen kanaldar boıynsha sý baǵasynyń aıyrmashylyǵy týraly surady.
Sondaı-aq, sharýalar «Qazsýshar» memlekettik kásipornyn jetildirý jáne strategııalyq mańyzy bar nysandardy respýblıkalyq menshikke qaıtarý jóninde usynystar aıtty.
Kezdesýdiń resmı bóligi aıaqtalǵannan keıin Nurjan Nurjigitov azamattardy jeke qabyldady.
Qoǵamdyq qabyldaýda «Qazsýshar» mekemesimen kelisimshart talaptary, sý resýrstary monıtorınginiń jerseriktik tehnologııalardy engizý jáne sýarý arnalary boıynda sorǵylardy ornatý sııaqty taqyryptar talqylandy.
«Máseleniń negizgi bóligi kanaldar men basqa da gıdrotehnıkalyq qurylystardy jóndeý men rekonstrýktsııaǵa qatysty ekenin túsinip otyrmyn. Bizdiń mınıstrlik uzaq jyldar boıy jınaqtalǵan kúrdeli máselelerdi kezeń-kezeńimen sheshýge nıetti. Halyqty bizdiń jumysymyz jáne bastamalarymyz týraly ýaqtyly habardar etý úshin mınıstrlik, „Qazsýshar“ jáne jergilikti atqarýshy organdar arasynda tyǵyz baılanys ornatý óte mańyzdy. Osy kezdesýge ýaqyt bólip kelgenderińizge kóp rahmet. Vegetatsııa maýsymy bastalǵannan keıin sýarý jumysynyń barysymen tanysý úshin Túrkistan oblysyna taǵy kelemin», — dedi Sý resýrstary jáne ırrıgatsııa mınıstri Nurjan Nurjigitov.
