Túrkistan oblysynda «Balýan tas sapary» ekspedıtsııasy bastaldy

TÚRKІSTAN. KAZINFORM – 18–21 naýryz aralyǵynda Túrkistan oblysynda «Qazaq kúshiniń kartasy» jobasy aıasynda «Balýan tas sapary» ekspedıtsııasy ótedi.

Túrkistan oblysy ákimdiginiń qoldaýymen uıymdastyrylatyn mádenı-tanymdyq joba ulttyq bahadúrlik murany jańǵyrtýǵa baǵyttalǵan. Joba avtory – kúsh mádenıetin zertteýshi Abylaıhan Qalnazarov. Ekspedıtsııany «Baluan tas» ulttyq sport túrleri jáne mádenıeti akademııasy júzege asyrady.

Sapar baǵyty Shymkent qalasy men óńirdiń birqatar aýdandaryn qamtıdy. Atap aıtqanda, qatysýshylar Saıram, Ordabasy, Otyrar, Báıdibek, Sozaq, Saýran aýdandary men Túrkistan qalasyn aralaıdy.

Joba avtorynyń aıtýynsha, ekspedıtsııa mazmuny aýqymdy ári kópqyrly.

– Ekspedıtsııa barysynda biz 13 tarıhı balýan tas nysanyn zerttep, qazaqtyń dástúrli kúsh mádenıetine qatysty derekterdi zerdeleımiz. Baǵdarlama aıasynda birqatar kıeli oryndarǵa zııarat etý josparlanǵan. Sonymen birge sapar aıasynda Otyrar aýdanynyń Sháýildir aýylynda kóne kúshtik rásimderdiń biri qaıta jańǵyrtylyp, mádenı rekonstrýktsııa jasalady, – deıdi Abylaıhan Qalnazarov.

Ekspedıtsııaǵa jýrnalıster, blogerler, ǵalymdar men sportshylardan quralǵan arnaıy top qatysady.

Aıta keteıik, «Qazaq kúshiniń kartasy» jobasy ótken jyly Naýryz meıramynda elordada bastaý alǵan. Buǵan deıin Aqtóbe jáne Pavlodar oblystaryna ekspedıtsııalar uıymdastyrylǵan. Túrkistan baǵyty jobanyń rýhanı-tarıhı turǵydan mańyzdy kezeńderiniń biri sanalady.

Jobanyń maqsaty – qazaqtyń dástúrli kúsh mádenıetin zertteý, balýan tastardy júıeleý jáne ulttyq mura retinde zamanaýı aınalymǵa engizý.