Túrkistan oblysynda balmuzdaq zaýyty ózenge qaldyq tógip jatyr — ákimdik jaýap berdi
TÚRKІSTAN. KAZINFORM — Tólebı aýdanynda jergilikti balmuzdaq zaýytynyń óndiristik qaldyqtardy ózenge tógip jatqany týraly turǵyndardyń shaǵymy áleýmettik jelide tarady.
Jelide jarııalanǵan beınejazbada aryq boıymen tartylǵan qubyrdan sútke uqsas aq tústi suıyqtyqtyń aǵyp jatqany kórinedi. Turǵyndardyń aıtýynsha, bul — óndiris ornynan shyǵarylǵan qaldyq.
Aýyl turǵyndary mundaı jaǵdaıdyń qorshaǵan ortaǵa zııan keltirýi múmkin ekenin aıtyp, quzyrly organdardan tekserý júrgizýdi suraǵan.
Osy jaǵdaıǵa baılanysty Tólebı aýdanynyń ákimdigi resmı túsinikteme berdi.
Ákimdik málimetinshe, beınejazba 2025 jylǵy 3 shildede Birinshi Mamyr aýylynyń turǵyny tarapynan túsirilgen. Onda «Balmuzdaq» JShS-nyń óndiristik aǵyndy sýlarynyń Badam ózenine tógilgeni kórsetilgen.
— Atalǵan derek boıynsha Birinshi Mamyr aýyldyq okrýginiń ákimi B.Maýsynbekov oqıǵa ornyna baryp, mán-jaıdy zerdeledi. Nátıjesinde quzyretti memlekettik organdarǵa tıisti sharalar qabyldaý týraly hattar joldandy, — delingen ákimdik jaýabynda.
Sondaı-aq ákimdiktiń habarlaýynsha, 2026 jylǵy 20 shildede aýdan ákiminiń orynbasary B.Qaıratulynyń tóraǵalyǵymen, zardap shekken balyq sharýashylyǵy ókilderiniń qatysýymen «Balmuzdaq» JShS aýmaǵynda kóshpeli jumys keńesi ótken. Onyń qorytyndysy boıynsha tıisti hattama rásimdelgen.
— Tekserý barysynda óndiristik aǵyndy sýlardy aǵyzýǵa paıdalanylǵan qubyr anyqtalyp, bólshektelip, demontaj jumystary júrgizildi. Alaıda 2026 jylǵy 21 shildede aǵyndy sýlardyń qaıtadan Badam ózenine tógilgeni anyqtaldy, — dep málimdedi aýdan ákimdigi.
Atalǵan faktige baılanysty Tólebı aýdany ákimdigi Túrkistan oblystyq ekologııa departamentine, Túrkistan oblystyq sanıtarııalyq-epıdemıologııalyq baqylaý departamentine jáne Túrkistan oblystyq mamandandyrylǵan tabıǵat qorǵaý prokýratýrasyna jospardan tys tekserý júrgizý, aǵyndy sý synamalaryn alý jáne zańnamada kózdelgen yqpal etý sharalaryn qabyldaý týraly hat joldaǵan.
Budan bólek atalǵan máseleni erekshe baqylaýǵa alý týraly Ekologııa jáne tabıǵı resýrstar mınıstri E. Nysanbaevtyń atyna da tıisti hat jiberilgen.
Eske salaıyq, buǵan deıin Birinshi Mamyr aýylynyń turǵyndary balmuzdaq óndiretin zaýyttyń káriz júıesinen shyǵatyn jaǵymsyz ıiske shaǵymdanǵan bolatyn. Olardyń aıtýynsha, bul másele shamamen 20 jyldan beri sheshimin tappaı keledi.
