Túrkistan oblysynda balalarǵa arnalǵan modýldi lager ashyldy
ASTANA. KAZINFORM — Tólebı aýdanynda balalardy jazǵy saýyqtyrýǵa arnalǵan modýldi lager ashyldy. Jańadan salynyp, paıdalanýǵa berilgen qosymsha 14 nysanda 7 aýysym boıynsha 2 myńnan astam bala jaz boıy demalmaq.
«Tólebı nury» otbasy úlgisindegi balalar úıiniń lageri alǵashqy aýysymda Qazyǵurt aýdanynyń 300-den astam oqýshysyn qabyldap úlgerdi. Barlyǵy kópbalaly jáne az qamtylǵan otbasynda tárbıelenip jatqan balalar.
Búgin saltanatty lenta qııý rásimine Túrkistan oblysy ákiminiń orynbasary Beısenbaı Tájibaev arnaıy kelip qatysyp, quttyqtaýyn arnady.
— Jazǵy demalys – balalar úshin qýanysh pen shabytqa toly erekshe kezeń. Lager ashý – bolashaqqa salynǵan ınvestıtsııa. Jas býynnyń jan-jaqty damýyna, bos ýaqytyn tıimdi ári mazmundy ótkizýine baǵyttalǵan modýldi jazǵy lager óz jumysyn bastady. Bul joba — memlekettiń qarajatyn tıimdi paıdalana otyra, qajettilikterdi qamtamasyz etedi. 5 memlekettik lagerde 52 modýldi lager salynyp jatyr. Joba negizinde 7500-den astam qosymsha oryn ashýǵa múmkindik týdy. Oblys ákimi Nuralhan Oralbaıuly qoldaý kórsetti. Osy apta Saryaǵash aýdanyndaǵy «Baldáýren» lageri 487 balany qabyldady. Maýsymdyq nysandardyń qurylysy qolǵa alynǵan sátten basy-qasynda júrip, sapaly iske asyrylýyn baqyladyq. Búgin jasóspirimderdiń baqytty júzderine taǵy kýá bolyp turmyz. Endigi maqsat — balalarǵa shynaıy shattyq pen qaýipsiz orta syılaý. Osy ortaq mindetti abyroımen atqarýǵa shaqyramyn.
Uıymdastyrýǵa atsalysqan barsha áriptesterge, ata-analarǵa jáne tárbıeshilerge alǵys bildiremiz! Oqýshylarǵa kóterińki kóńil-kúı men umytylmas sátter tileımiz! — dedi Beısenbaı Dáýletuly.
Іs-sharada oblystyq bilim basqarmasy basshysynyń orynbasary J.Nurpeıisov, Qazyǵurt aýdany ákiminiń orynbasary M.Áshirbaev, Tólebı aýdany ákimi apparatynyń basshysy A.Ómirtaı, aýdandyq bilim bóliminiń basshysynyń m.a G.Abılhasova boı kórsetti. Qos aýdannyń ardagerleri ıgilikti bastamany júzege asyrǵan azamattarǵa alǵys bildirip, batalaryn berdi.
«Tólebı nury» lagerinde 14 modýldi nysannan bólek, ashana, basseın, qyzdar men er balalarǵa jeke ájethana men jýynatyn oryndar, shatyrlar bar. Ár modýldi ǵımaratta 20 oqýshyǵa arnalǵan jatyn oryndary qarastyrylǵan. Bári jańa jıhazdarmen qamtylǵan.
Balalardyń bes mezgil tamaqtanýy, qaýipsizdigi, kúndelikti baǵdarlamasy, oıyndary men saıystary, ıntellektýaldyq jáne mádenı sharalary baqylaýda.
Jazǵy lager — tek demalys orny ǵana emes, shyǵarmashylyqty ushtaıtyn, dostyqty nyǵaıtatyn, jańa qabiletter men qyzyǵýshylyqtardy damytatyn orta. Áleýmettik teńdikti, patrıottyq tárbıeni nasıhattaıdy. Munda ár bala ózin erkin sezinip, óneri men sporttyq qabiletin shyńdaıdy. Kóshbasshylyq qasıetterin jetildiredi. Salaýatty ómir saltyn ustanýǵa beıimdeıdi. Ulttyq qundylyqtardy boıyna sińiredi. Balalardy qylmystan, kóshedegi qaýip-qaterden qorǵaıdy.
Aıta keteıik, Túrkistan óńirinde jalpy 43 myńnan astam bala jazǵy saýyqtyrý aımaqtarynda tynyǵady. 10 memlekettik jáne 24 jekemenshik lager qyzmet kórsetedi. Budan bólek, 300 myńnan astam oqýshy mektep janyndaǵy lagerler men arnaıy ekskýrsııalar, tanymdyq sharalarǵa qatysady. Jaýapty basqarmalarmen birlesip uıymdastyrý jalǵasady.
Eske salaıyq, Túrkistandyq jastar «Taza Qazaqstan» ekologııalyq sharasy aıasynda tımbıldıng ótkizdi.