Túrkistan oblysynda balalardyń qaraýsyz qalýynan 8 sýdaǵy jazataıym oqıǵa tirkeldi
TÚRKІSTAN. KAZINFORM – Túrkistan oblysy Tótenshe jaǵdaılar departamentiniń basqarma basshysy Dáýren Júsipov bıyl naýryz-sáýir aılarynda óńirde sýdaǵy jazataıym oqıǵalar boıynsha 8 jaǵdaı tirkelgenin aıtty.
Onyń sózinshe, atalǵan faktilerdiń barlyǵy kámeletke tolmaǵandarǵa qatysty bolǵan. Oqıǵalardyń negizgi sebebi – balalardyń qaraýsyz qalýy.
– Oblys aýmaǵyndaǵy jazataıym jaǵdaılardyń ekeýi sýarmaly kanaldarda tirkeldi. Keles jáne Mashat ózenderinde taǵy eki jaǵdaıda balalar sýǵa qulap, aǵyp ketken. Budan bólek eki derek jylyjaı mańyndaǵy sý jınalǵan shuńqyrlarda, bireýi káriz júıesindegi shuńqyrda, al taǵy bireýi úı aýlasyndaǵy sý toly ydysqa qulaý saldarynan bolǵan. Ókinishke qaraı 7 bala kóz jumǵan. Keles aýdanyndaǵy bir balany izdestirý jumystary jalǵasyp jatyr, - dedi ol baspasóz máslıhatynda.
Spıkerdiń málimdeýinshe, 2025 jyly oblys aýmaǵynda túrli jaǵdaıda sýda bolǵan oqıǵalarǵa qatysty 55 adam qaza tapqan. Onyń ishinde 11 jaǵdaı shomylý kezinde tirkelgen, 6-aýy – balalar.
Ótken jyly shomylý maýsymynda júrgizilgen reıdterden soń 151 jeke tulǵaǵa 2 mln teńgeden astam, al 3 zańdy tulǵa men 3 kásipkerge 235 myń teńge teńge kóleminde aıyppul salynǵan.
Aıta keteıik, Túrkistan oblysy Keles aýdanynda 8 jasar balany izdeý boıynsha izdestirý-qutqarý jumystary áli jalǵasyp jatyr. Anasynyń aıtýynsha, ol 23 naýryz kúni Keles ózeninde sýǵa qulap, batyp ketken.
Sondaı-aq Túrkistan oblysy Mashat aýylynda sýǵa ketken 2 jasar balanyń denesi tabylǵanyn jazǵan edik.
