Túrkistan oblysynda balalar alańshasyna tartylǵan elektr symy qaýip tóndirip tur
TÚRKІSTAN. KAZINFORM – Sozaq aýdany Abaı aýylynda jergilikti turǵyn balalar oıyn alańshasyna tartylǵan ashyq elektr symy balalardyń ómiri men qaýipsizdigine qater tóndirip turǵanyn aıtyp, dabyl qaqty.
Vıdeoda elektr symyn oıyn alańshasyna tikeleı jalǵap, temirge baılap qoıǵanyn aıtqan turǵyn qaýipsizdik talaptaryna saı aqaýdy tez arada jóndemese, qaıǵyly jaǵdaı bolýy múmkin ekenin aıtqan.
Atalǵan másele boıynsha Kazinform tilshisiniń joldaǵan suraýyna jaýap bergen aýdan ákimdigi tıisti sharalar qabyldanyp jatqanyn habarlady.
– Sholaqqorǵan aýyldyq okrýgi ákimshiligi tarapynan jaǵdaı baqylaýǵa alynyp, anyqtalǵan kemshilikterdi joıý maqsatynda balalar oıyn alańshasyna kelip turǵan elektr qýaty qaýipsizdik talaptaryna sáıkes ýaqytsha ajyratyldy, - delingen aýdan ákimdiginiń baspasóz qyzmeti usynǵan aqparatta.
Balalar oıyn alańshasy 2024 jyly demeýshilik qarajat esebinen salynǵan.
– Aldaǵy ýaqytta kemshilikterdi tolyq qalpyna keltirý jáne qaýipsizdik talaptaryna sáıkestendirý jumystary júrgiziledi, - dedi ákimdik ókilderi.
Eske salaıyq, Sozaq aýylynda 9 qańtar kúni qaýipti oqıǵa anyqtaldy. Kóshe shamyna jalǵanǵan elektr symdary bir-birine tıip, ashyq tok paıda bolǵan. Sol jerden ótken sıyr symǵa tıip, tok soǵyp ólip qalǵan.
Budan buryn Oral qalasynda tok soqqan bala kóz jumǵanyn jazǵan edik.