Túrkistan oblysynda balabaqshaǵa 1,3 mlrd teńge zańsyz aýdaryldy ma: basqarma ne deıdi
TÚRKІSTAN. KAZINFORM — Áleýmettik jelilerde Tólebı aýdandyq bilim bóliminiń basshysy Shuǵa Turmahanbetqyzy Nurabaevaǵa qatysty jáne «Baton-2» balabaqshasyna 1,3 mlrd teńge bıýdjet qarajaty zańsyz aýdarylǵany týraly aqparat tarady.
Jazba avtory Shuǵa Turmahanbetqyzy men «Baton-2» bóbekjaı-balabaqshasynyń basshysy Aısulý Turmaǵambetqyzynyń týǵan apaly-sińlili ekenin alǵa tartyp, 2017-2025 jyldary atalǵan balabaqshaǵa bıýdjetten shamamen 1,3 mlrd teńge baǵyttalǵany týraly málimet keltirgen. Avtor bul derekterdi resmı tekserýdi qajet etetinin aıtyp, qarajatty kim bólgeni, kim qol qoıǵany jáne qarjynyń jumsalýyn kim baqylaǵany jóninde másele kótergen.
Sondaı-aq jazbada yqtımal múddeler qaqtyǵysynyń qalaı rettelgeni aıtylyp, bıýdjet qarajatynyń jumsalý zańdylyǵyna qatysty tıisti qujattardy jarııalaý qajettigi kórsetilgen.
Osyǵan baılanysty Túrkistan oblysynyń bilim basqarmasy resmı túsinik berdi.
— «Baton-2» balabaqshasyna 1,3 mlrd teńge zańsyz aýdaryldy degen aqparattyń shyndyqqa janaspaıtynyn habarlaımyz. Mektepke deıingi bilim berý uıymdaryn qarjylandyrý zańnamada belgilengen tártippen júzege asyrylady. Qarajat tárbıelenýshiler sany men bekitilgen normatıvter negizinde memlekettik bilim berý tapsyrysy jáne jan basyna shaqqandaǵy qarjylandyrý sheńberinde bólinedi. Bul sheshimdi bilim bólimi basshysy jeke-dara qabyldamaıdy, — delingen basqarma taratqan túsiniktemede.
Sonymen qatar basqarma atalǵan somanyń tıisti kezeńdegi naqty qarjylandyrý kólemine sáıkes kelmeıtinin atap ótti.
— Qazirgi ýaqytta bilim bóliminiń basshysy óziniń ar-namysyna, abyroıy men iskerlik bedeline nuqsan keltiretin jáne shyndyqqa janaspaıdy dep esepteıtin málimetterdiń taralýyna baılanysty sotqa júgindi. Atalǵan derekterge quqyqtyq baǵany sot beredi. Bıýdjet qarajatyna qatysty aqparatty taratý kezinde tekserilmegen málimetterge emes, resmı qujattar men naqty faktilerge súıenýge shaqyramyz, — dep málimdedi bilim basqarmasy.
Buǵan deıin túrkistandyq muǵalimder mekteptegi aqsha jınaý men qysymǵa qatysty dabyl qaqqanyn jazǵan edik.
