Túrkistan oblysynda balabaqsha ǵımaraty órtendi
ASTANA. KAZINFORM – Túrkistan oblysy Áden ata aýylyndaǵy balabaqshalardyń birinde órt boldy.
Tótenshe jaǵdaılar mınıstrliginiń málimetinshe, órt sóndirý bólimsheleri oqıǵa ornyna jetken kezde bir qabatty ǵımarattyń shatyry janyp jatqan. Dereý órtti sóndirý jumystary uıymdastyryldy.
Oqıǵa kezinde balabaqsha ishinde balalar bolmaǵan.
- Qutqarýshylardyń jedel ári úılesimdi áreketteriniń nátıjesinde órt tolyq sóndirildi. Jalyn 244 sharshy metr aýmaqty sharpyǵan, - dep jazdy vedomstvodan.
Zardap shekkender joq. Qazirgi ýaqytta órttiń shyǵý sebepteri anyqtalyp jatyr.
Tótenshe jaǵdaı qyzmeti azamattardy órt qaýipsizdigi talaptaryn saqtaýǵa shaqyrady.
Aıta keteıik, buǵan deıin Túrkistan oblysynda 2 adam jumys ornynda qaza tapqany habarlandy.
