Túrkistan oblysynda aınalymda júrgen 6 myńnan astam gaz ballonnyń 90 paıyzy jaramsyz

TÚRKІSTAN. KAZINFORM – Jyl basynan beri oblysta gaz ballondarynyń jarylýy boıynsha 9 jaǵdaı tirkelgen. Saldarynan 14 adam jaraqat aldy. Bul týraly oblystyq TJD memlekettik órt baqylaý basqarmasynyń basshysy Nurbolat Peden málimdedi. 

Jazataıym oqıǵalardyń basym bóligi gaz ballondaryn saqtaý jáne paıdalaný kezindegi qaýipsizdik erejelerin saqtamaýdan bolǵan. 

«Jalpy aıtqanda órttiń aldyn alý maqsatynda basqarma tarapynan túsindirý jumystary júrgizilýde. Oblystyq jumyspen qamtýdy úılestirý jáne áleýmettik baǵdarlamalar basqarmasynda áleýmettik jaǵdaıy tómen 28 538 otbasy esepke alynǵan. Qazirgi tańda áleýmettik jaǵdaıy tómen osal toptaǵy azamattardyń úılerine 271 dana gazosıgnalızatorlar ornatyldy. Jylytý maýsymynyń aldynda gaz qubyrlaryn mindetti túrde tekserý qajettigin eskertemiz», - dedi Nurbolat Peden.

TJM Ónerkásiptik qaýipsizdik komıtetiniń Túrkistan oblysy boıynsha departamentiniń bólim basshysy Erǵalı Myrzahmetov aımaqta aınalymda júrgen 6 myńnan astam gaz ballonnyń 90 paıyzy jaramsyz ekenin jetkizdi. 

«Oblys aýmaǵynda gaz salasy boıynsha departamentte tirkelgen jalpy kólemi 5 550,7 tekshe metr 7 gaz toltyrý stantsııasy bar. Sonymen qatar turmysta qoldanylatyn gaz balondaryn toltyratyn 4 uıym jumys isteıdi. Sondaı-aq 50-den asa kásipkerlik sýbektileriniń Túrkistan qalasy men oblys aýmaǵynda 300-den asa avtogaz quıý beketteri qyzmet kórsetedi. Gaz toltyrý beketteriniń aınalymynda 6 000 asa turmystyq gaz ballondar bar. Olardyń 90 paıyzy qyzmet etý merzimi ótken bolsa da paıdalanylyp keledi», - dedi Erǵalı Myrzahmetov.

Aıta keteıik, bqdan buryn Túrkistan oblysynda 64,5 mln teńgeni quraıtyn asfalt tósemi buzylyp, qaıta salynǵanyn jazǵan bolatynbyz.