Túrkistan oblysynda áıel júrgizýshi eki balany qaǵyp ketti

TÚRKІSTAN. KAZINFORM — Túrkistan oblysynda eki kámeletke tolmaǵan jaıaý júrginshini kóligimen qaǵyp ketken júrgizýshi qamaýǵa alyndy. 

Oqıǵa Saıram aýdanyna qarasty Aqsýkent aýylynda bolǵan.

Túrkistan oblystyq Polıtsııa departamentiniń málimetinshe, atalǵan derek boıynsha qylmystyq is qozǵaldy.

Aldyn ala málimetterge sáıkes, jergilikti turǵyn «Changan» markaly avtokólikti basqaryp kele jatyp, kóshelerdiń birinde kámeletke tolmaǵan jaıaý júrginshini soǵyp ótken.

Osydan keıin júrgizýshi oqıǵa ornynan boı tasalap, basqa kóshede taǵy bir kámeletke tolmaǵan mektep oqýshysyn qaǵyp ketken. Zardap shekkender medıtsınalyq mekemege jetkizildi. Olardyń biri tekserýden keıin úıine jiberildi.

— Júrgizýshi ustalyp, qamaýǵa alyndy. Qazirgi tańda oqıǵanyń barlyq mán-jaıyn anyqtaýǵa baǵyttalǵan qajetti tergeý is-sharalary júrgizilip jatyr, — delingen habarlamada.

Sondaı-aq beınebaqylaý kameralaryndaǵy jazbalar zerdelenip, kýálardan jaýap alynyp jatyr.

Tergeý nátıjesi boıynsha tıisti protsessýaldyq sheshim qabyldanady.

Budan buryn Shymkentte avtobýs júrgizýshisi jeńil kólikti qasaqana qaqqanyn jazǵan edik.