Túrkistan oblysynda áıel óz úıinde aıaýsyz soqqyǵa jyǵylyp, tonaldy
TÚRKІSTAN. KAZINFORM – Belgisiz adamdar túnde Leńgir qalasyndaǵy jeke turǵyn úıge kirip, áıelge shabýyl jasaǵan. Keıin onyń uıaly telefonyn alyp ketken. Polıtsııa qylmystyq is qozǵap, kúdiktilerdi izdestirip jatyr.
Áleýmettik jelilerde Túrkistan oblysyndaǵy Leńgir qalasynyń turǵynyna jasalǵan shabýyl týraly vıdeo tarady. Jazba avtorlarynyń aıtýynsha, shabýyl jasaǵandar birneshe adam bolǵan jáne betperde taqqan. Sondaı-aq áıeldi qorlaý men uryp-soǵý tańǵa deıin jalǵasqany aıtylǵan.
Oqıǵaǵa qatysty Túrkistan oblysynyń Polıtsııa departamenti shabýyl faktisi boıynsha qylmystyq is qozǵalǵanyn habarlady.
– Aldyn ala málimet boıynsha, túngi ýaqytta turǵyn úıge belgisiz adamdar kirip, jábirlenýshige dene jaraqatyn salǵan jáne onyń uıaly telefonyn alyp ketken. Qazirgi ýaqytta áıeldiń jaǵdaıy turaqty, densaýlyǵyna qaýip tónip turǵan joq, – dep habarlady Túrkistan oblysy PD.
Quqyq qorǵaý organdary qazir kúdiktilerdi anyqtap, ustaýǵa, sondaı-aq oqıǵanyń barlyq mán-jaıyn anyqtaýǵa baǵyttalǵan tergeý jáne jedel-izdestirý sharalary júrgizilip jatqanyn atap ótti.
Tergeý barysy oblystyq polıtsııa departamenti basshylyǵynyń baqylaýynda. Vedomstvo Qylmystyq-protsestik kodekstiń 201-babyna sáıkes, tergeýge qatysty ózge aqparattyń jarııalanýǵa jatpaıtynyn málimdedi.
Buǵan deıin Shymkentte burynǵy áıeline qyshqyl tókken er adam ustalǵan bolatyn. Áıel aýyr kúıik alyp, aýrýhanaǵa jatqyzyldy. Qylmystyq is densaýlyqqa qasaqana ortasha aýyrlyqtaǵy zııan keltirý faktisi boıynsha tergelip jatyr.
