Túrkistan oblysynda avtogaz tapshylyǵy joq – ákimdik
TÚRKІSTAN. KAZINFORM – Búginde óńirde avtomobıldik gaz quıý stantsııalarynyń sany – 248 birlikke jetken. Sondaı-aq, turmystyq ballondarǵa arnalǵan 2 gaz quıý beketi bar.
Áleýmettik jelide Túrkistan oblysynda avtogaz tapshylyǵy týraly aqparat tarap jatyr. Tipti, keı aqparattarda beketterde kezek qalyptasa bastaǵany aıtylady.
Atalǵan máselege qatysty resmı pikir bildirgen Túrkistan oblysy ákimdiginiń baspasóz qyzmeti óńirde avtogaz tapshylyǵy joq ekendigin jetkizdi.
«Bıylǵy jyldyń ІV toqsanyna QR Energetıka mınıstrligi 35 980 tonna (qazan 10 920 tonna, qarasha 12 536 tonna, jeltoqsan 12 524 tonna) suıytylǵan munaı gazy kólemi bólindi. Jalpy oblystyń táýliktik tutyný kólemi 450-500 tonnany quraıdy. 03.10.2024 jylǵa bólingen kólemnen avtogaz quıý beketterinde 350 tonna suıytylǵan munaı gaz qaldyǵy bar. Qazirgi tańda, oblystaǵy gaz taratýdy zańsyz shekteý turǵysy boıynsha aýdan, qala ákimdikterinen qurylǵan jumysshy top tarapynan gaz beketterin tekserý jumystary kúndelikti júrgizilýde. Másele turaqty baqylaýda» - delingen ákimdik aqparattynda.
Aıta keteıik, Túrkistan oblysynda suıyltylǵan munaı gaz taratýshy 44 kásipkerlik sýbektisi tirkelgen. Gaz jelisi uıymdary qýatynyń jalpy kólemi – 8307,1 m3 quraıdy. 2024 jyly 1 shildesinen bastap QR Energetıka mınıstriniń 2024 jylǵy 26 maýsymdaǵy №233 buıyryǵyna sáıkes, oblysta suıytylǵan munaı gazynyń baǵasy – 1 lıtr úshin 70-75 teńgege kóterildi.
Budan buryn Májilis depýtaty Qaırat Balabıev Premer-mınıstrdiń birinshi orynbasary Roman Sklıarǵa gaz máselesin kóterip, depýtattyq saýal joldaǵan bolatyn. Depýtattyń aıtýynsha suıytylǵan gazdy ballonǵa quıyp satýdyń tártibi qatańdatylǵannan beri jaǵdaı ýshyǵyp ketken.
Al, TJD mamandary Túrkistan oblysynda aınalymda júrgen 6 myńnan astam gaz ballonnyń 90 paıyzy jaramsyz ekendigin aıtty.
