Túrkistan oblysynda avtogaz tapshylyǵy baıqalyp jatyr
TÚRKІSTAN. KAZINFORM — Kólik júrgizýshileri sońǵy kúnderi avtogaz quıý beketterinde kezektiń kóbeıgenine shaǵymdandy.
Júrgizýshilerdiń aıtýynsha, Túrkistan qalasyndaǵy avtogaz beketteriniń kóbinde gaz joq.
— Gaz bar beketterdiń ózinde saǵattap kútýge májbúrmiz. Aldyn ala jazylyp jatyrmyz. Bir bekette kútip turǵan kólikter sany 100-den asady. Ózim túste kelip edim, tek keshke ǵana kezegim jetti. Kentaý qalasynda da jaǵdaı osyndaı, — dedi qala turǵyny.
Osyǵan baılanysty Kazinform tilshisiniń saýalyna Túrkistan oblysy energetıka jáne turǵyn úı-kommýnaldyq sharýashylyq basqarmasynyń bólim basshysy Qýanysh Ómirálıev jaýap berip, jaǵdaıdy túsindirdi.
Onyń aıtýynsha, óńirde gazdyń táýliktik tutyný kólemi 500-550 tonnany quraıdy. Sáýir aıyna oblysqa 8 392 tonna suıytylǵan munaı gazy bólingen. Alaıda osy aıda shamamen 40 paıyz deńgeıinde tapshylyq bolady dep boljanǵan.
— Bul jaǵdaı «PQOP» JShS (Shymkent munaı óńdeý zaýyty) óndiristik qýattarynda 27 naýryz ben 5 mamyr aralyǵynda júrgizilip jatqan josparly-aldyn alý jóndeý jumystaryna baılanysty bolyp otyr. 9-12 sáýir aralyǵynda Aqtóbe munaı gaz zaýytynan oblysqa 2304 tonna gaz jóneltildi. Aı sońyna deıin atalǵan zaýyttan kezeń-kezeńimen qajetti kólem jiberiledi. Sonymen qatar, Teńizshevroıl kompanııasynan 612 tonna suıytylǵan gaz jetkizildi, — dedi ol.
Spıkerdiń sózinshe, qazirgi tańda Túrkistan, Kentaý qalalary men Tólebı, Saýran, Otyrar aýdandarynda suıyq otyn tapshylyǵy baıqalǵan.
— Atalǵan aýdan, qalalarǵa «Teńizshevroıl» JShS-nen suıytylǵan munaı gazyn alatyn iri sýbektiler arqyly stantsııalarǵa qajetti kólemde turaqty jetkizilip otyr. Alaıda bul sýbektilerdiń aýdan, qalalar aýmaǵynda avtogaz quıý beketteriniń az bolýy sebepti kezek kóbeıip, tapshylyq sezilip otyr, — dedi Qýanysh Ómirálıev.
Qalǵan sýbektilerge tıesili suıyq otyn kólemi Aqtóbe munaı-gaz zaýyty bekitken kestege sáıkes temirjol arqyly jóneltilip jatyr. Qazir «Qazaqstan temir joly» qyzmetkerlerimen birlesip, ony jedel túrde gaz toltyrý stantsııalaryna jetkizý jumystary qolǵa alynǵan.
— Oblys boıynsha 13 sáýir kúni saǵat 09:00–den bastap gaz toltyrý stantsııalarynan sáýir aıyna bólingen suıytylǵan munaı gazy aýdan, qalalarǵa jóneltile bastady. Bul shara tapshylyq týyndaǵan ahýaldy turaqtandyrýǵa baǵyttalǵan, — dedi spıker.
Aıta keteıik, qazir óńirde avtogaz quıý beketterindegi qor kólemi 394 tonnany quraıdy. Búginde oblysta suıytylǵan munaı gazyn taratýmen 43 kásipkerlik sýbektisi aınalysady. Gazdyń bólshek baǵasy lıtrine 102-107 teńge aralyǵynda.
Budan buryn Mańǵystaýda gazdy ózge óńirlerge satqan kásipkerler anyqtalǵanyn jazǵan edik.
