Túrkistan oblysynda aýtızmmen aýyratyn balalar kóbeıgen

TÚRKІSTAN. KAZINFORM – «AMANAT» partııasy Túrkistan oblystyq fılıaly janyndaǵy Bilim berý men densaýlyq saqtaý máseleleri jónindegi keńestiń otyrysy ótip, onda aýtızm spektri buzylǵan balalardyń qazirgi ahýaly men olarǵa kórsetiletin kómek tetikteri talqylandy. Bul týraly oblys ákimdiginiń baspasóz qyzmeti habarlady.

Jıynda Túrkistan oblystyq densaýlyq saqtaý basqarmasy basshysynyń orynbasary Dáýren Tólepov óńirdegi jaǵdaıǵa qatysty statıstıkalyq málimetterdi usyndy.

Onyń aıtýynsha, sońǵy úsh jylda aýtızmmen tirkelgen balalar sany 54-ten 169-ǵa deıin kóbeıgen. Al jalpy aýrýshańdyq kórsetkishi 152 jaǵdaıdan 437-ge jetip, bes jyl ishinde derek bes esege artqan.

Bıyl jyl basynan beri oblystyq psıhıkalyq densaýlyq ortalyǵynyń balalar bóliminde aýtızm dıagnozymen 29 bala em qabyldaǵan. Oblysta 10 PMPK, 17 túzetý kabıneti qyzmet kórsetedi. PMPK arqyly 207 aýtızmi bar bala qoldaý alyp otyr.

Sondaı-aq áleýmettik saladaǵy ahýal týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Mekenhan Qyryqbaev baıandady. Onyń aıtýynsha, oblysta múgedektigi bar balalar sany 15 myńnan asqan.

– Óńirde aýtızmi bar balalarǵa jan-jaqty kómek kórsetý maqsatynda «Qamqorlyq» mentaldy buzýshylyqtary bar balalarǵa arnalǵan arnaýly áleýmettik qyzmetter kórsetý ortalyǵy qurylǵan. Onda bir mezette 125 bala medıtsına, psıhologııa, pedagogıka, mádenı jáne áleýmettik baǵytta keshendi qoldaý alady. Ortalyq qajetti jabdyqpen tolyq qamtamasyz etilip, onyń kóp bóligi Fınlıandııa, Japonııa jáne Avstrııadan ákelingen. Ashylýy jeltoqsan aıyna josparlanyp otyr, – delingen oblys ákimdiginiń baspasóz qyzmeti usynǵan aqparatta.

Eske sala keteıik, buǵan deıin qazaqtildi robot aýtızmdi qalaı emdep júrgenin jazǵan edik.