Túrkistan oblysynda aýlasyna qarasora ekken turǵyn ustaldy
ASTANA. KAZINFORM — Túrkistan oblysynda turǵynnyń aýlasynan 36 túp qarasora tárkilendi, dep habarlaıdy Polisia.kz.
Túrkistan oblysynda polıtseıler esirtki quramdas ósimdikterdi zańsyz ósirý faktisin anyqtady.
— Jedel-izdestirý is-sharalary barysynda Saıram aýdandyq polıtsııa basqarmasynyń qyzmetkerleri 52 jastaǵy jergilikti turǵynnyń óz úıiniń aýlasynda esirtki quramdas ósimdikter ósirip otyrǵanyn anyqtady. Oqıǵa ornyna jedel-tergeý toby jiberilip, tıisti tekserý jumystary júrgizildi. Nátıjesinde aýladan 36 túp ósimdik anyqtalyp, tárkilendi, — delingen aqparatta.
Saraptama nátıjesinde tárkilengen ósimdikterdiń qarasora ekeni anyqtaldy. Olardyń jalpy salmaǵy 6,5 keliden asty.
Kúdiktiniń aıtýynsha, ol esirtki quramdas ósimdikterdi jeke paıdalaný maqsatynda ósirgen.
Qazirgi tańda esirtki quramdas ósimdikterdi zańsyz ósirý faktisi boıynsha qylmystyq is qozǵalyp, sotqa deıingi tergep-tekserý júrgizilip jatyr. Kúdikti qamaýǵa alyndy.
Buǵan deıin Jambyl oblysynda arnaıy operatsııa barysynda 438 keli qarasora tárkilenip, esirtki ósirdi degen kúdikpen Taraz qalasynyń 40 jastaǵy turǵyny ustaldy.
