Túrkistan oblysynda aýylǵa kirgen shıbóri úsh adamdy jaraqattady
TÚRKІSTAN. KAZINFORM — Túrkistan oblysy Otyrar aýdanynda shıbóri aýyl ishine kirip, adamdarǵa shabýyl jasady.
Oqıǵa Eski Shilik aýylynda kúndizgi saǵat 17:00 shamasynda bolǵan.
Turǵyndardyń aıtýynsha, jyrtqysh kóshede oınap júrgen eki balaǵa tap bergen. Saldarynan 15 jastaǵy jasóspirim men 4 jasar qyz zardap shekti.
Kómekke kelgen aýyl turǵyny Talǵat Myńbaev shıbórini uryp óltirgen. Alaıda balalardy arashalamaq bolǵan kezde jyrtqysh oǵan da shabýyldap, jaraqattaǵan.
Oqıǵadan keıin olar Otyrar aýdandyq ortalyq aýrýhanasynyń qabyldaý bólimine jetkizildi.
Oblys ákimdiginiń habarlaýynsha, veterınarııalyq qyzmet mamandary shıbóriden qutyrý aýrýyna kúdikti patologııalyq materıal alyp, aýdandyq zerthanaǵa joldady.
— Zardap shekkenderge qutyrýǵa qarsy profılaktıkalyq ekpe salyndy. Qazirgi tańda olardyń jaǵdaıy turaqty, dárigerlerdiń baqylaýynda. Bir adam aýrýhanada em qabyldap jatyr, — delingen habarlamada.
Infektsııanyń taralýynyń aldyn alý maqsatynda shıbóri anyqtalǵan aýmaq pen zardap shekken turǵyndardyń aýlalary zalalsyzdandyryldy.
Jaǵdaı tıisti qyzmetterdiń baqylaýyna alynǵan. Aldyn alý jáne qaýipsizdik sharalary jalǵasyp jatyr.
Budan buryn ShQO-da iri qaraǵa túlkiden taraǵan qutyrý oshaǵy oqshaýlanǵanyn jazǵan edik.
