Túrkistan oblysynda «Aýyldaǵy bir kúnim» jobasy ótip jatyr
ASTANA. KAZINFORM — Búgin Túrkistan oblysynda Jastar resýrstyq ortalyǵynyń bastamasymen «Aýyldaǵy bir kúnim» baıqaýy bastaldy. Oǵan 13 komanda qatysady. Bul týraly QR Mádenıet jáne aqparat mınıstrliginiń baspasóz qyzmeti málimdedi.
Jobanyń basty maqsaty — jastar arasynda qazaqtyń tól mádenıetin, ulttyq salt-dástúrlerin nasıhattaý, rýhanı-adamgershilik qasıetterdi damytý.
«Baıqaý Qazyǵurt aýdanyndaǵy tumsa tabıǵat aıasynda ótip jatyr. Qatysýshylarǵa áserli bolýy úshin, etno-aýyl quryldy. Jigitter sadaq atý, arqan tartý sııaqty ulttyq oıyndarda baq synaıdy. Qyzdar aspazdyq qabiletterin kórsetedi. Olar qurt pen et qamyryn jaıyp, úlkenderdiń baǵasyn alady», — delingen habarlamada.
Sońǵy kezeńde zııatkerlik oıyn uıymdastyrylady, saıysqa qatysýshylarǵa Qazaqstannyń mádenıeti men tarıhy týraly suraqtar qoıylady.
Júldeger komandalar aqshalaı syılyqtarǵa ıe bolady. Aıta keteıik, «Aýyldaǵy bir kúnim» baıqaýy alǵash ret 2023 jyly ótti.
