Túrkistan oblysynda «Aýyl amanaty» aıasynda 3 000-nan astam adam jumyspen qamtyldy

TÚRKІSTAN. KAZINFORM - «Aýyl amanaty» jobasynyń kórsetkishi boıynsha Túrkistan oblysy respýblıkada kósh bastap tur. Bul týraly Túrkistan oblystyq aýyl sharýashylyǵy basqarmasynyń bólim basshysy Baýyrjan Qaldanov málimdedi.

Memleket basshysynyń tapsyrmasy negizinde elimizde «Aýyl amanaty» baǵdarlamasy júzege asyp keledi. Jobanyń basty maqsaty − aýyl turǵyndarynyń tabysyn arttyrý. Baǵdarlama bastalǵaly aýyl-aımaqtarda myńdaǵan sharýa memlekettik qoldaýdyń arqasynda kásip ashyp, sharýashylyǵyn damytty. Máselen, «Aýyl amanaty» jobasy aıasynda ótken jylǵy óndirilgen ónim kólemi jaǵynan Túrkistan oblysy 13,3% kórsetkishpen respýblıkada kósh bastady. 

«2023 jyly Respýblıkalyq bıýdjetten atalǵan baǵdarlamany júzege asyrýǵa 19,8 mlrd. teńge bólinip, jalpy 3 256 joba qarjylandyryldy. Nátıjesinde 3 413 adam turaqty jumyspen qamtyldy. Baǵdarlama aıasynda ótken jyly sharýalar — 1 trln 158,7 mlrd teńgeniń ónimin óndirdi. Kásipkerlikti qoldaý maqsatynda kooperatıvter negizinde damýǵa basymdyq berilmek. Kooperatıvterge 992 mıllıon teńgege 40 aýyl sharýashylyǵy tehnıkalary men jabdyqtar satyp alyndy. Bıyl baǵdarlama aıasynda respýblıkalyq bıýdjetten óńirge 10,6 mıllıard teńge bólinip, egin, mal, qus jáne balyq sharýashylyǵyna, sondaı-aq kooperatıvterdi jabdyqtaýǵa baǵyttaý kózdelip otyr. Jobanyń bul jylǵy ereksheligi — kásipkerlerdiń ýaqytyn únemdeý maqsatynda ótinishterdi elektrondy túrde qabyldaý júıesi jumys iske qosyldy», - dedi Baýyrjan Qaldanov.