Túrkistan oblysynda attestattaýdan ótpegen 1 mektep pen 2 balabaqsha jabyldy
TÚRKІSTAN. KAZINFORM – Óńirdegi 99 mekteptiń bilim berý qyzmeti biliktilik talaptaryna sáıkes kelmeıdi. Bul týraly Túrkistan oblysy bilim salasynda sapany qamtamasyz etý departamentiniń basshysy Ǵalymjan Almatov málimdedi.
Bilim salasynda sapany qamtamasyz etý departamentiniń mamandary jyl qorytyndysy boıynsha oblys aýmaǵyndaǵy mektepterde tekserý júrgizgen. Tekserýge túsken 99 mektepte bilim berý qyzmeti biliktilik talaptaryna sáıkes kelmeı, zań buzýshylyqtar bolǵan. Soǵan baılanysty 5 laýazymdy jáne 94 zańdy tulǵaǵa ákimshilik quqyq buzýshylyq boıynsha hattama toltyrylyp, jalpy 16 mln teńge kóleminde aıyppul salyndy.
Sondaı-aq barlyq 99 mektepke «zań buzýshylyqtardy joıý týraly» nusqama berildi. Al, 89 mekteptiń bilim berý qyzmetimen aınalysatyn memlekettik lıtsenzııasy ýaqytsha toqtatyldy.
Sonymen qatar departament mamandary 498 bilim berý uıymyna memlekettik attestattaý júrgizgen. Qorytyndy shyqqannan keıin 417 bilim berý uıymy birinshi rette memlekettik attestattaýdan ótpeı qalǵan. Onyń ishinde 161 balabaqsha, 255 mektep, 1 kolledj bar.
— Qaıta memlekettik attestattaý sharasy 441 bilim berý uıymynda júrgizildi. 407 bilim berý uıymy qaıta attestattaldy. Al, 34 bilim berý uıymy qaıta memlekettik attestattaýdan ótpedi. Onyń ishinde 1 kolledj, 24 mektep, 9 balabaqsha bar. Qaıta memlekettik attestattaýdan soń 2 kolledjdiń bilim berý qyzmetine berilgen lıtsenzııasy qaıtaryldy. Sondaı-aq 1 mektep, 2 balabaqsha jabyldy. 29 bilim berý uıymy qaıta memlekettik attestatatýdan ótpegendikten profılaktıkalyq baqylaý tizimine engizildi, - dedi Ǵalymjan Almatov.
Aıta keteıik, budan buryn Túrkistan oblysynda 310 oryndyq mektepte myń bala oqyp júrgenin jazǵan bolatynbyz.