Túrkistan oblysynda atasy nemeresin zorlady degen kúdikke ilindi
TÚRKІSTAN. KAZINFORM – Áleýmettik jelide Túrkistan oblysy Otyrar aýdanynda atasy nemeresin zorlady degen aqparat tarady.
Osyǵan baılanysty Kazinform tilshisine Túrkistan oblysy polıtsııa departamenti resmı túsinik berdi.
Vedomstvonyń málimetinshe, balanyń anasy ulynyń zorlanǵan bolýy múmkin ekenin aıtyp, aryzdanǵan. Atalǵan jaıtqa baılanysty sotqa deıingi tergeý bastalǵan.
– Otyrar aýdany turǵynynyń kámeletke tolmaǵan ulyna qatysty bolýy múmkin quqyqqa qaıshy is-áreketter boıynsha jazǵan aryzyna sáıkes sotqa deıingi tergeý júrip jatyr. Alǵashqy tergeý is-sharalarynyń nátıjesinde zańsyz áreketter anyqtalmady, balanyń denesinen jaraqattar tabylǵan joq, – delingen resmı aqparatta.
Qazirgi tańda barlyq mán-jaılardy anyqtaýǵa baǵyttalǵan qajetti is-sharalar jalǵasyp jatyr. Qosymsha saraptamalar taǵaıyndalǵan.
Polıtsııa ókilderi tergeý nátıjesi boıynsha qoldanystaǵy zańnamaǵa sáıkes sheshim qabyldanatynyn habarlady. Sonymen qatar tergeý múddesine baılanysty ózge aqparat jarııa etilmeıtinin jáne azamattardy tek resmı derekkózderge súıenýge shaqyrdy.
Budan buryn Otyrar aýdanynda 6 jasar qyzdy 9 synyp oqýshysy zorlamaq boldy degen málimet taraǵanyn jazǵan edik.
