Túrkistan oblysynda asarmen salynyp jatqan mektep-ınternat ǵımaraty zańdastyryla ma
TÚRKІSTAN. KAZINFORM – Túrkistan oblysy Saıram aýdanyndaǵy Mankent aýylynda asar jolymen bastalǵan №6 mektep-ınternat qurylysyna qajet qujattar rásimdelmegen. Qazir nysan qurylysyn zańdastyrý múmkindigi qaralyp jatyr.
Bul mektep-ınternat 1954 jyly paıdalanýǵa berilgen. Ǵımarat 180 orynǵa arnalǵan. 2025-2026 oqý jylynda munda 155 oqýshy bilim alǵan.
Saıram aýdandyq bilim bóliminiń málimetinshe, mektep ǵımaraty qoldanysqa berilgennen beri kúrdeli jóndeýden ótpegen. Bilim oshaǵynda esikter, jıhazdar eskirgen, jataqhana qabyrǵalarynda jaryqtar paıda bolǵan. Sondaı-aq ashana barlyq oqýshyny bir mezgilde tamaqtandyrýǵa beıimdelmegen.
Qazir mektep-ınternatta áleýmettik qoldaýdy qajet etetin, az qamtylǵan, kópbalaly jáne tolyq emes otbasylardan shyqqan balalar bilim alyp, tárbıelenedi.
– Ǵımarattyń jaǵdaıyn eskere otyryp, aýyl turǵyndary óz bastamasymen jáne demeýshilik qarajat esebinen jańa ǵımarat qurylysyn bastaǵan. Alaıda qurylys asar jolymen júrgizilgendikten, ony bastaýǵa jáne júrgizýge qajetti qujattardyń resimdelmegeni anyqtaldy, – delingen aýdandyq bilim bólimi usynǵan aqparatta.
Taıaýda Túrkistan oblysy ákiminiń orynbasary E.Daýylbaevtyń Saıram aýdanyna jumys sapary barysynda atalǵan qurylysty zańdastyrý múmkindigin qarastyrý jóninde tıisti memlekettik organdarǵa tapsyrmalar berildi.
Quzyrly organdardyń qorytyndysy usynylǵannan keıin qurylysty odan ári jalǵastyrý máselesi qaralady.
Buǵan deıin Túrkistan oblysynda qaıtarylǵan aktıvter esebinen 30 áleýmettik nysan salynyp jatqany týraly jazǵan edik.
