Túrkistan oblysynda asa aýyr qylmys úshin izdeýde júrgen adam ustaldy
TÚRKІSTAN. KAZINFORM – Túrkistan oblysynda polıtsııa kisi óltirdi degen kúdikpen izdeýde júrgen er adamdy qolǵa túsirdi.
Aldyn ala málimetterge sáıkes, 31 jastaǵy azamat Almaty oblysynda adam óltirý deregi boıynsha izdeýde bolǵan.
Kúdikti Jetisaı aýdandyq polıtsııa bóliminiń qyzmetkerleri júrgizgen jedel-izdestirý is-sharalary barysynda Jetisaı qalasyndaǵy kóshelerdiń birinen qolǵa tústi.
– Ustalǵan azamat odan ári tekserý jumystaryn júrgizý jáne izdeýdi jarııalaǵan tarapqa tapsyrý maqsatynda polıtsııa bólimine jetkizildi, – dep habarlady Túrkistan oblysy polıtsııa departamenti.
Qazir oqıǵanyń barlyq mán-jaıyn anyqtaýǵa baǵyttalǵan qajetti tergeý amaldary júrgizilip jatyr.
Budan buryn Túrkistan oblysynda kólik jýý ornynda kisi óltirgender uzaq merzimge sottalǵanyn jazǵan edik.
