Túrkistan oblysy Arys aýdanynda ırrıgatsııalyq jelini rekonstrýktsııalaý jobasy bastaldy
ASTANA. KAZINFORM – Túrkistan oblysyna jumys sapary aıasynda Sý resýrstary jáne ırrıgatsııa mınıstri Nurjan Nurjigitov óńirdegi sý sharýashylyǵy nysandarynyń jaı-kúıimen, sondaı-aq júzege asyrylyp jatqan jobalardyń barysymen tanysty.
Túrkistan oblysynyń Ordabasy aýdanynda mınıstr uzyndyǵy 26,15 shaqyrym bolatyn «Naıman» kanalynyń rekonstrýktsııa jumystarymen tanysty. Búginde nysandy betondaý jumystary tolyq aıaqtalǵan.
Sý resýrstary jáne ırrıgatsııa mınıstrligi málimetinshe, joba aıasynda kanal boıynda 75 gıdrotehnıkalyq nysan salý da qarastyrylǵan. Qazirgi tańda qurylys-montaj jumystary 98% oryndaldy.
Otyrar aýdanynyń aýmaǵynda Nurjan Nurjigitov Arys ózeninen sýarmaly eginshilikke sý berýge arnalǵan «Qyzyltý» sorǵy stantsııasynyń jumysymen tanysty. Qazirgi ýaqytta Sý resýrstary jáne ırrıgatsııa mınıstrligi nysanǵa ornatylatyn úsh jańa sorǵy satyp alý jumystaryn júrgizip jatyr.
Arys aýdanynda mınıstr 143,4 shaqyrym ırrıgatsııa jelisin rekonstrýktsııalaý jobasy aıasyndaǵy jumystarmen tanysty. Bul joba 8281,7 gektar sýarmaly jerdi sýarý sýymen qamtamasyz etýge baǵyttalǵan.
Nurjan Nurjigitov merdiger uıym basshylarymen kezdesip, kásiporynnyń óndiristik bazasynda boldy.
– Byltyrǵy vegetatsııa kezeńi klımat ózgerip jatqan jaǵdaıda sýdy durys basqarýdyń mańyzyn aıqyn kórsetti. Júzege asyrylyp jatqan ınfraqurylymdyq jobalar qolda bar sý resýrstaryn, sonyń ishinde sý shyǵynyn azaıtý arqyly tıimdi paıdalanýǵa múmkindik beredi. Bul nátıjege qol jetkizý úshin qujat ázirleýden bastap, qurylys pen nysandardy paıdalanýǵa berýge deıingi barlyq jumysqa tolyq baqylaý qamtamasyz etilýi qajet, – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, mınıstr Túrkistan oblysynyń sý salasynda rotatsııa júrgizýdi tapsyrdy.
Túrkistan oblysynda tórt jańa sý qoımasy salynady.
