Túrkistan oblysynda árbir ardagerge 5 mln teńgeden beriledi

TÚRKІSTAN. KAZINFORM-Óńirde ekinshi dúnıejúzilik soǵystyń 9 ardageri turady.

Túrkistan oblysynyń ardagerlerine Jeńistiń 80 jyldyǵyna oraı ákimdik tarapynan 5 mln teńge kóleminde birjolǵy materıaldyq kómek beriledi. Al, ekinshi dúnıejúzilik soǵys ardagerlerine teńestirilgen azamattarǵa sanattary boıynsha 50 myń teńgeden 120 myń teńgege deıin birjolǵy qarjylaı kómek kórsetý josparlanyp otyr. Sondaı-aq elimizdiń «Ardagerler týraly» zańyna sáıkes áleýmettik qoldaý sharalary kórsetiledi. 

Bul týraly Túrkistan oblysynyń ákimi Nuralhan Kósherovtiń tóraǵalyǵymen ótken apparattyń aptalyq májilisinde málim boldy. 

Jıynda Jeńistiń 80 jyldyǵyn atap ótý boıynsha is-shara jospary keńinen talqylanyp, isteletin jumys pysyqtaldy. 
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Asııa Temirbaevanyń baıandaýynsha, is-sharalar jospary tek merekelik kúnderdi ǵana emes, jyl boıy oryndalýy qamtylǵan.

Búgingi tańda Túrkistan oblysynda ekinshi dúnıejúzilik soǵysqa qatysýshylar men olarǵa teńestirilgen 3 305 adam bar. Onyń ishinde, 9-y soǵys ardageri. Olar Jetisaı, Ordabasy, Otyrar, Saram, Saryaǵash, Sozaq, Qazyǵurt aýdandary men Kentaý, Túrkistan qalalarynda turady. 

Jıynda oblystyq qoǵamdyq damý basqarmasynyń basshysy Erlan Kúzembaev is-shara jospary týraly baıandady. Jeńistiń 80 jyldyǵy aıasynda oblysta aýqymdy is-sharalar ótkizý kózdelip otyr. Atap aıtqanda, batyrlardyń esimderin nasıhattaý maqsatynda túrli konkýrstar, ekskýrsııalar, ǵylymı-praktıkalyq konferentsııalar, «Jas Ulan» áskerı-sporttyq oıyndary, buqaralyq sporttyq sharalar, áskerı sherý ótkizý josparlanyp otyr. 

«Salamatty Qazaqstan» mamandandyrylǵan poıyzyn iske qosý aıasynda ardagerler men tyl eńbekkerleri jáne shalǵaıdaǵy stansalardyń turǵyndaryna medıtsınalyq bilikti mamandar tarapynan tegin emdeý sharalary uıymdastyralyp jatyr. 

Aıta, budan buryn 8 naýryz merekesine oraı túrkistandyq kópbalaly analar bir rettik kómek alatynyn jazǵan bolatynbyz.