Túrkistan oblysynda araq iship kólik aıdaıtyndar azaımaı otyr

Túrkistan oblysynda araq iship, kólik aıdaıtyndar kóp, dep habarlaıdy Kazinform.

Túrkistan oblysynyń polıtseıleri 5 táýlik ishinde 110 qylmysty «izin sýytpaı» ashty.

Sondaı-aq, buryn jasalǵan 3 qylmysty ashyp, izdeýde júrgen 5 adamdy ustady.

Reıd barysynda 1500-ge jýyq aýlany aralaǵan tártip saqshylary tún jarymynda kóshede júrgen 424 balany polıtsııa bólimine jetkizdi.

Óńir joldarynda mas kúıinde kólik júrgizgen 33 júrgizýshini jaýapqa tartty.

Jalpy 6787 ákimshilik quqyq buzý faktisi anyqtaldy.

«Túrkistan oblysynyń aýmaǵynda „Quqyqtyq tártip“ jedel aldyn alý sharasy ótkizildi. Polıtseıler óńirde quqyq buzýdyń aldyn alý jáne jolyn kesýge, qoǵamdyq tártip pen jol qaýipsizdigin qamtamasyz etýge, kóshede jáne qoǵamdyq orynda qylmystyń aldyn alýǵa basymdyq berip otyr. Aldaǵy ýaqytta bul baǵyttaǵy jumys jalǵasyn tabady» delingen Túrkistan oblysy polıtsııa departamentiniń baspasóz qyzmeti usynǵan aqparatta.