Túrkistan oblysynda aptap ystyqta qaıda shomylýǵa bolady

TÚRKІSTAN. KAZINFORM – Sýǵa túsý maýsymy bastalmaı jatyp, oblys boıynsha 30 adamnyń sýǵa ketý deregi tirkelip otyr. Onyń ishinde 13 jasóspirim bar.

Túrkistan oblysy Tótenshe jaǵdaılar departamentiniń málimetinshe, eń kóp qaıǵyly oqıǵalar Ordabasy aýdanynda tirkelgen. Munda 7 adam sýǵa ketken. Odan keıin Saryaǵashta – 5, Shardara men Qazyǵurtta – 4, Keleste – 3, Jetisaı men Otyrarda – 2, Báıdibek, Túlkibas, Saıramda – 1 jaǵdaıdan tirkelgen.

Anyqtalǵan derekterge súıensek, eki jasóspirim ruqsat etilmegen jerlerde shomylyp, Shardara sý qoımasy men Boraldaı ózeninde kóz jumǵan.

TJD mamandary jyl basynan beri 742 ret reıd júrgizip, sýdaǵy qaýipsizdik erejesin buzǵan 53 jeke tulǵaǵa 729 386 teńge kóleminde aıyppul salǵan. 

Jalpy, óńirdegi arnaıy shomylý oryndarynyń azdyǵy eń úlken máselelerdiń biri aınalyp otyr. Ótken jyly atqarylǵan jumystardyń nátıjesinde qosymsha 14 shomylatyn arnaıy jaǵajaı iske qosylǵan. Degenmen, bul 2 mln-nan astam halqy bar oblys úshin azdyq eteri anyq. Sondyqtan bıyl shomylýǵa arnalǵan ashyq jaǵajaılardyń sanyn kóbeıtý josparlanyp otyr. Máselen, óńirde shomylýǵa arnalǵan 27 oryn belgilengen. Al, bıyl shomylý orny 70-ke jetkizilmek. 

Sonymen qatar, jeke kásipkerlerdiń basseınderinde balalardy jáne kóp balaly otbasylardyń balalaryn tegin shomyldyrý, júzýge úıretý maqsatynda memorandým jasalyp jatyr.

Qaýipsiz shomylý úshin ruqsat etilgen oryndar tizimi

1. Arys ózeni (Arys qalasy men Otyrar aýdanyndaǵy ózen jaǵasy)
2. Kóksaraı shıpajaıy (Arys qalasynda ornalasqan jaǵajaı jáne emdik saýyqtyrý orny)
3. Syrdarııa ózeni (Arys qalasy, Shardara, Keles, Otyrar aýdandarynyń aýmaǵyndaǵy jabaıy sýǵa shomylý orny)
4. Shardara sý qoımasy («Kúmis jaǵajaıy» demalys aımaǵy)
5. Shardara sý qoımasy («Altyn jaǵajaı» demalys aımaǵy)
6. Shardara sý qoımasy (Demalys aımaǵy)
7. Qasqasý ózeni («Kóktóbe» demalys orny)
8. Birkólik taý ózeni («Maıak» demalys orny)
9. Birkólik taý ózeni («Nurly aımaq» demalys orny)
10. Birkólik taý ózeni («Bastaý» demalys orny)
11. Birkólik taý ózeni («Jaqsy kórem» demalys orny)
12. Aqmeshit taý ózeni («Jeruıyq» demalys orny)
13. Aqmeshit taý ózeni («Shıpa bulaq» demalys orny)
14. Saıramsý ózeni («EcoV ı Iiage» «Kaskasu» demalys orny)
15. Mashat ózeni («DıA» demalys orny)
16. Mashat ózeni («Aq shatyr» demalys orny)
17. Mashat ózeni («Bes-Arys» demalys orny)
18. Mashat ózeni («Mashat» demalys orny)
19. Boraldaı ózeni (Báıdibek aýdany aýmaǵyndaǵy ózen jaǵasy)
20. Qoshqar ata ózeni (Báıdibek aýdany aýmaǵyndaǵy ózen jaǵasy)
21. Qosqorǵan sý qoımasy (Kentaý qalasy, Qarnaq aýyly, Qusshyata eldi mekeni aýmaǵyndaǵy sý qoımasynyń jaǵasy)
22. «Keńsaı-Qosqorǵan 2» sý qoımasy (Sý qoımasynyń jaǵasy)
23. Túrkistan týrıstik-rekreatsııalyq ortalyǵyndaǵy jasandy kól (Shaǵa) 
24. Túrkistan qalasyndaǵy eskek esý kanaly
25. «Jetikól» kólder júıesi
26. Ákimshilik iskerlik ortalyqta ornalasqan qalalyq saıabaqtaǵy «jasandy kól»
27. Birinshi Prezıdent saıabaǵyndaǵy «Jasandy sý qoımasy»

Tótenshe jaǵdaılar departamentiniń mamandary sýǵa túsý kezinde qaýipsizdik sharalaryn qatań saqtaý kerektigin eskertedi.

Aıta keteıik, budan buryn Shymkentte qaı jerde sýǵa túsýge bolatyndyǵyn jazǵan bolatynbyz.