Túrkistan oblysynda aptap ystyqqa baılanysty jol qyzmeti kúsheıtilgen rejımge kóshti
ASTANA.KAZINFORM - Túrkistan oblysynda respýblıkalyq mańyzy bar KAZ-06 «RF shekarasy (Jaısan) – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy (Nur Joly)» avtomobıl jolynda tsementbeton jabynynyń jergilikti temperatýralyq deformatsııasyn joıý jumystary júrgizilip jatyr. Bul týraly QazAvtoJol habarlady.
Buǵan deıin «Qazgıdromet» RMK óńirde aýa temperatýrasynyń +44 °C-qa deıin kóterilýi múmkin ekeni týraly eskertý jarııalaǵan bolatyn.
16 shilde kúni saǵat 18:00 shamasynda Shymkent – Túrkistan baǵytyn josparly patrýldeý barysynda «QAJservıs» JShS Túrkistan oblystyq fılıalynyń №68 jol paıdalaný ýchaskesiniń mamandary joldyń 2243-shaqyrymynda tsementbeton jabynynyń jergilikti temperatýralyq deformatsııasyn der kezinde anyqtady. Oqıǵa orny birden qorshalyp, ýaqytsha jol belgileri ornatylyp, jol qozǵalysynyń qaýipsizdigin qamtamasyz etý sharalary qabyldandy.
Qazirgi ýaqytta ýchaskede jol qyzmetteri jumys júrgizip jatyr.
Arnaıy tehnıka jumyldyrylyp, qalpyna keltirý jumystary jalǵasyp jatyr. Joldaǵy aqaýdy qysqa merzimde joıyp, kólik qozǵalysyn tolyq qalpyna keltirý úshin barlyq qajetti shara qabyldanyp jatyr.
Aıta ketý kerek, uzaq ýaqytqa sozylǵan aptap ystyq kezinde tsementbeton jabynyna úlken temperatýralyq júkteme túsedi. Aýa temperatýrasy +40 °C-tan asqanda jol jabynynyń temperatýrasy +60…+70 °C-qa deıin, al kólik qozǵalysy qarqyndy ýchaskelerde odan da joǵary kóterilýi múmkin.
Sonyń saldarynan beton plıtalary keńeıip, olardyń ishinde kerneý paıda bolady. Mundaı jaǵdaılar álemniń kóptegen elinde ystyq kezeńde kezdesetin tabıǵı paıdalaný ereksheligi bolyp sanalady.
Qazirjol qyzmetteri tsementbeton jabyny bar avtomobıl joldaryna kúsheıtilgen baqylaý júrgizip, táýlik boıy monıtorıng jumystaryn jalǵastyryp jatyr.
Qazaqstanda aýa temperatýrasynyń kúrt kóterilýine baılanysty tsementbeton jabyndary bar avtomobıl joldarynda temperatýralyq deformatsııalar paıda bolýy múmkin. Bul týraly QR Kólik mınıstrliginiń Jol aktıvteri sapasynyń ulttyq ortalyǵy málimdedi.
