Túrkistan oblysynda aptap ystyq shegirtkelerdiń belsendiligin arttyrdy

TÚRKІSTAN. KAZINFORM – Qazirgi tańda óńirde hımııalyq óńdeý jumystary túngi aýysymda júrgizilip jatyr.

Mamandardyń málimetinshe, kúnniń kúrt ysýy shegirtkelerdiń belsendiligin arttyrǵan. Osyǵan baılanysty óńdeý jumystarynyń tıimdiligin arttyrý maqsatynda dárileý túngi ýaqytqa aýysty.

Sońǵy tórt kún ishinde Otyrar, Arys jáne Ordabasy aýdandarynyń shekaralas aýmaqtarynda 850 gektar jer óńdeldi.

Al kúndizgi ýaqytta arnaıy toptar alqaptardy aralap, monıtorıng júrgizip keledi.

Bozaı aýyldyq okrýginde – 40 anyqtaýshy men 7 tehnıka, Jambyl aýyldyq okrýginde – 30 anyqtaýshy men 6 tehnıka, Oshaqty aýyldyq okrýginde – 10 anyqtaýshy men 3 tehnıka, Birlik aýyldyq okrýginde 60 anyqtaýshy men 11 tehnıka jumys istep jatyr.

Oblys ákiminiń orynbasary Nurbol Turashbekovtyń aıtýynsha, turǵyndardan túsken aqparat negizinde anyqtalǵan oshaqtar erekshe baqylaýǵa alynyp, shuǵyl túrde dárilenedi.

Búgingi kúnge deıin oblys boıynsha shegirtkege qarsy jalpy kólemi 368,6 myń gektar jerge hımııalyq óńdeý júrgizilgen. Atap aıtqanda, Arys aýdanynda – 132,9 myń gektar, Keles aýdanynda – 108,8 myń, Saryaǵashta – 97 myń, Shardarada – 5 724, Ordabasyda – 11,5 myń, Báıdibekte – 5 750, Qazyǵurt aýdanynda – 4 954 gektar jer hımııalyq óńdeýden ótti.

Aıta keteıik, budan buryn Túrkistan oblysy jyl saıyn shegirtkeden zardap shegetinin jazǵan bolatynbyz.