Túrkistan oblysynda alty aıda mal urlyǵynyń 48 deregi tirkelgen
TÚRKІSTAN. KAZINFORM – Óńirde mal urlyǵy toqtamaı tur. Alty aıda 48 derek tirkelip, 12 qylmystyq top ustaldy.
Túrkistan oblystyq polıtsııa departamentiniń málimetine súıensek, 2026 jyldyń alǵashqy alty aıynda óńirde mal urlyǵynyń 48 deregi tirkelgen. Bul ótken jyldyń osy kezeńimen salystyrǵanda 14 derekke kóp. Onyń ishinde 35 qylmystyń beti ashylǵan.
– Eń kóp mal urlyǵy Qazyǵurt jáne Ordabasy aýdandarynda tirkeldi. Eki aýdanda da 8 derekten esepke alyndy. Al Keles aýdanynda 5 derek tirkeldi, – delingen vedomstvo usynǵan aqparatta.
Jyl basynan beri óńirde mal urlyǵymen aınalysqan 12 qylmystyq top ustaldy. Olardyń 21 mal urlyǵy deregine qatysy bary anyqtalǵan. Sondaı-aq jarty jyl ishinde urlanǵan 225 bas maldyń 172-si tabylyp, zańdy ıelerine qaıtaryldy.
Eske salaıyq, ótken jyly oblysta 615 bas mal urlanyp, onyń 474-i ıelerine qaıtarylǵan. Polıtseıler júrgizgen jedel-izdestirý is-sharalary barysynda mal urlyǵymen aınalysqan 19 qylmystyq top ustalyp, 56 adam qylmystyq jaýapkershilikke tartyldy.
Buǵan deıin 2026 jyldyń bes aıynda elimiz boıynsha mal urlaýmen aınalysqan 58 toptyń ustalǵany týraly habarlaǵan edik.
