Túrkistan oblysynda alǵashqy modýldi lager jataqhanasy paıdalanýǵa berildi
TÚRKІSTAN. KAZINFORM – Balalardyń jazǵy saýyqtyrýyn qaýipsiz jáne tıimdi uıymdastyrý – basty nazarda. Túrkistan oblysynyń ákimi Nuralhan Kósherov jazǵy lagerlerdiń jumys sapasyn qadaǵalaýyna alǵan. Bıyl óńirde alǵash ret modýldik lager jobasy júzege asyryldy. Jańa bastama arqyly 5 memlekettik lagerge 52 modýldi jataqhana qoıylyp, 7 500-den astam qosymsha oryn ashylý josparlanyp otyr.
Modýldi lagerdiń alǵashqy korpýsy «Balaýsa» jazǵy saýyqtyrý lagerinde ashyldy. Túrkistan qalasynyń bilim bólimine qarasty balalardyń demalys kesheni kúrdeli jóndeýden ótkizilip, 10 modýldi jataqhanasy paıdalanýǵa berildi. Olardyń árqaısysy 20 balaǵa arnalǵan jatyn orynmen qamtamasyz etilgen.
Túgeldeı jańa jıhazdar men tósek oryndary bar. Ár balanyń jeke kıimderin salatyn shkaftary qarastyrylǵan. Bólme ishi jaryq, ári zamanaýı úlgide bezindirilgen.
Lagerdiń alǵashqy aýysymyna 350 bala qabyldandy. Onyń ishinde, 250 bala – Túrkistan qalasynyń, 100 bala – Saýran aýdanynyń oqýshylary. Qalǵan balalar lagerdiń jańartylǵan aldynǵy korpýsynda tynyǵady.
«Balaýsa» jazǵy saýyqtyrý ornynda 7 lekpen jalpy 2 myńnan astam balany qabyldaý josparǵa endi. Sondaı-aq Maqtaaral aýdanyndaǵy «Tolaǵaı» lagerin jóndeý jumystary júrgizilip, bıylǵy jyldyń alǵashqy demalýshylaryn qabyldady. Jalpy ár maýsymda 200-ge jýyq balamen 8 maýsym boıynsha 1 500 bala jazǵy saýyqtyrýmen qamtýdy jasparlap otyr.
Demalýshy balalar 5 mezgil tamaqtanyp, kúnderin tańerteńgi jattyǵýmen bastap, sporttyq-estafetalyq jarystar, ıntelektýaldyq saıystar, mádenı baǵdarlamalar men qatar basseınde túrli shynyǵý jattyǵýlarymen, jaz aılaryndaǵy demalysty kóńildi ótkizip júr.
Aıta keteıik, bıyl Túrkistan oblysyndaǵy qala syrtyndaǵy saýyqtyrý oryndarynda 43 myńnan astam bala demalady. Oqýshylarǵa 10 memlekettik, 24 jekemenshik lager qyzmet kórsetedi. Odan bólek, 300 myńnan astam oqýshy mektep janyndaǵy lagerler men arnaıy ekskýrsııalar, tanymdyq sharalarǵa qatysady.