Túrkistan oblysynda alǵashqy maqta alqaptaryna sý jiberildi
ASTANA. KAZINFORM — Túrkistan oblysynyń Jetisaı aýdanynda maqta alqaptaryn sýarý jumystary bastaldy
«Qazsýshar» RMK-nyń Túrkistan fılıaly bıyl Jetisaı aýdanyndaǵy alǵashqy maqta alqaptaryna sý jetkize bastady. «Tólegen ata» sharýa qojalyǵy sýarmaly sýdy K-30 kanaly arqyly alyp otyr. Egistik alqaptaryn sýarýǵa kirisken dıqandar bıyl sýdyń qajetti kólemde jáne turaqty túrde berilip jatqanyn aıtyp jatyr.
— Bıyl 9,5 gektar alqapqa maqta ektik, qazir alqapty sýarýdy bastadyq. Sý mol, turaqty kelip jatyr. Ol úshin Sý resýrstary jáne ırrıgatsııa mınıstrligine alǵysymyzdy bildiremiz, — dedi «Tólegen ata» sharýa qojalyǵynyń tóraǵasy Meırambek Qýatbek.
Aıta keteıik, jyl basynan beri «Qazsýshar» RMK-nyń Túrkistan fılıaly Jetisaı aýdanyndaǵy aýyl sharýashylyǵy taýaryn óndirýshilerdiń qajettiligi úshin 340 mln tekshe metrden astam sý jetkizdi.
Buǵan deıin AShM bıyl kúrish pen maqta alqaby taǵy azaıǵanyn habarlady.
