Túrkistan oblysynda alǵash ret baýyr transplantatsııasy jasaldy
TÚRKІSTAN. KAZINFORM – Anasyna qyzy baýyryn bólip berdi.
48 jastaǵy Ýlıana Nýrmetova baýyr tsırrozymen naýqastanyp kelgen. Sodan 2019 jyldan bastap gastroenterologtyń baqylaýynda boldy. Oǵan Child-Turcotte-Pugh jiktemesi boıynsha V klasty vırýs etıologııaly baýyr tsırrozy dıagnozy qoıylǵan. Naýqas árdaıym ambýlatorlyq jáne statsıonarlyq em qabyldap júrgen. Degenmen, sońǵy kezderi gıpertenzııamen, isinýmen, gıpersplenızm sındromymen asqynyp, naýqastyń jaǵdaıyn qıyndata túsken.
Baýyr transplantatsııasy Túrkistan oblystyq klınıkasynyń bazasynda ulttyq ǵylymı hırýrgııa ortalyǵynyń mamandary men akademık B.Baımahanovtyń jetekshiligimen ótti. Operatsııa sheńberinde V.Mýtagırov, M.Jumabekova (anestezıologtar), M.Doshanov, S.Tileýov, J.Ospan (hırýrgtar) jáne oblystyq klınıkalyq aýrýhananyń mamandary belsendi jumys atqardy. Donor retinde naýqastyń 19 jastaǵy qyzy Elvıra Sahavıtdınova anasyna baýyryn bólip berdi.
- Qazirgi ýaqytta naýqas dárigerlerdiń dınamıkalyq baqylaýynda. Otadan keıingi kezeń aýyr asqynýlarsyz ótip, transplantatsııalanǵan organnyń qyzmeti birtindep turaqtalyp keledi. Bul operatsııa aımaq tarıhyndaǵy alǵashqy baýyr transplantatsııasy boldy jáne Túrkistan oblysynda transplantologııa salasynyń damýyna jańa múmkindik ashty, - delingen Túrkistan oblysy Densaýlyq saqtaý basqarmasynyń baspasóz qyzmeti usynǵan aqparatta.
Aıta keteıik, budan buryn Túrkistan oblysynda 89 jastaǵy patsıentke kúrdeli ota sátti jasalǵanyn jazǵan bolatynbyz.